(ACCnews) ოფიციალური კიევი ამერიკის ადმინისტრაციას სთხოვს, მის ეკონომიკას ყოველთვიურად 2 მლრდ დოლარის ოდენობით დაეხმაროს, წინააღმდეგ შემთხვევაში, როგორც უკრაინაში აცხადებენ, ამ ჰუმანიტარული დახმარების გარეშე ქვეყნის ეკონომიკა კიდევ უფრო გაუარესდება. ამის შესახებ ინფორმაციას The Washington Post-ი უკრაინის ფინანსთა მინისტრ სერგეი მარჩენკოზე დაყრდნობით ავრცელებს.
როგორც The Washington Post-ი აღნიშნავს, ვაშინგტონში ვიზიტისას მარჩენკო აცხადებდა, რომ კიევს სჭირდებოდა 5 მლრდ დოლარის ფინანსური დახმარება აუცილებელი ხარჯების გასაწევად, საიდანაც 2 მლრ-ს მიიღებდა შტატებისგან.
ფინანსთა მინისტრის განცხადებით, ეკონომიკური მხარდაჭერა აუცილებელია იმისთვის, რომ სახელმწიფომ შეძლოს პენსიების გაცემა, ასევე ჯანდაცვის და განათლების სფეროში დასაქმებულებისთვის ხელფასის გადახდა.
გასული კვირის ბოლოს აშშ-ის პრეზიდენტმა ჯო ბაიდენმა, განაცხადა, რომ ვაშინგტონი კიევისთვის ეკონომიკური დახმარების სახით დამტებით 500 მლნ დოლარს გამოყოფდა.
ცნობისთვის, უკრაინის პრეზიდენტმა ვოლოდიმირ ზელენსკიმ განაცხადა, რომ ომის დასრულების შემდეგ უკრაინას დასჭირდებოდა 600 მლრდ დოლარის ფინანსური დახმარება ქვეყნის აღსადგენად.
