“მოლაპარაკებები გამოავლენს, ვინ არის მეგობარი, ვინ პარტნიორი და ვინ გვიღალატა ფულისთვის“- ზელენსკი

(ACCnews) უკრაინის პრეზიდენტი, ვოლოდიმირ ზელენსკი დღეს ბრიუსელში დაგეგმილი სამი სამიტისგან „მნიშვნელოვანი ნაბიჯების გადადგმას“ ელოდება.

როგორც ზელენსკიმ განაცხადა, მოლაპარაკებები გამოავლენს, „ვინ არის მეგობარი, ვინ არის პარტნიორი და ვინ გვიღალატა ფულისთვის“.

„ყველა პოლიტიკოსებმა უნდა დაუჭირონ მხარი თავისუფლებას. მათ უნდა დაუჭირონ მხარი სიცოცხლისთვის ბრძოლას. ველოდებით მნიშვნელოვან ნაბიჯებს ნატოდან, ევროკავშირიდან და „დიდი შვიდეულიდან“. ჩვენ ვიცით, რომ რუსებმა უკვე დაიწყეს მათი ინტერესების ლობირება. ეს არის ომის ინტერესები. ჩვენ ვიცით, რომ ისინი მუშაობენ ზოგიერთ პარტნიორთან“, – განაცხადა ზელენსკიმ.

უკრაინის პრეზიდენტის თქმით, მისი ქვეყანა „მტკიცე პოზიციით“ იქნება წარმოდგენილი დღეს დაგეგმილ სამივე სამიტზე. მანვე ხაზი გაუსვა, უკრაინის იარაღის მიწოდებით მხარდაჭერის მნიშვნელობას.

„ჩვენ არ მიგვიღია თვითმფრინავი და თანამედროვე რაკეტსაწინააღმდეგო იარაღი. ჩვენ არ მიგვიღია ტანკები, გემსაწინააღმდეგო აღჭურვილობა. რუსეთის ძალებს შეუძლიათ გააგრძელონ ათასობით ჩვენი მოქალაქის მკვლელობა, ჩვენი ქალაქების განადგურება. მხოლოდ იმიტომ, რომ ძალიან ბევრი დამპყრობელია. მხოლოდ იმიტომ, რომ რუსეთი ათწლეულების მანძილზე ემზადებოდა ასეთი ომისთვის“, – განაცხადა ზელენსკიმ.

უკრაინის პირველმა პირმა აღნიშნა, რომ მათ ითხოვეს უკრაინის „ცის დახურვა“, ისევე როგორც, ნატოს დახმარება, რომ ყოფილიყო ეფექტური და შეუზღუდავი.

დღეს ბრიიუსელში ნატოს, ევროკავშირისა და „დიდი შვიდეულის“ სამიტები გაიმართება, სადაც მთავარი განსახილველი თემა უკრაინაში რუსეთის შეჭრა იქნება.