(ACCnews) “აშშ და მისი მოკავშირეები რუსეთის წინააღმდეგ ახალ სანქციებს გამოაცხადებენ,” – ამის შესახებ ეროვნული უსაფრთხოების საკითხებში აშშ-ის პრეზიდენტის მრჩეველმა, ჯეიკ სალივანმა განაცხადა.
“ევროპაში ვიზიტის ფარგლებში, პრეზიდენტი ჩვენს პარტნიორებს შეუერთდება რუსეთზე შემდგომი სანქციების დასაწესებლად და არსებული სანქციების გასამკაცრებლად, რათა უზრუნველვყოთ სანქციების მკაცრი აღსრულება“, – აღნიშნა ჯეიკ სალივანმა.
შეგახსენებთ, უკრაინაში შეჭრის შემდეგ აშშ-მ და მისმა მოკავშირეებმა რუსეთს მკაცრი ეკონომიკური სანქციები დაუწესეს. ეს ზომები მოიცავს სანქციებს რუსული ბანკებისა და ოლიგარქების მიმართ და ზოგიერთი რუსული ბანკის SWIFT-ის საერთაშორისო საბანკო სისტემიდან გათიშვას.
