(ACCnews) უკრაინის პრეზიდენტმა ვოლოდიმირ ზელენსკიმ დამოუკიდებელ რუს ჟურნალისტებთან ინტერვიუში განაცხადა, რუმ რუსეთთან სამშვიდობო შეთანხმების ფარგლებში, უკრაინა მზადაა განიხილოს ნეიტრალური სტატუსის მიღება, მაგრამ ეს უნდა იყოს გარანტირებული მესამე მხარის მიერ და ასევე გატანილ უნდა იქნეს რეფერენდუმზე.
“უსაფრთხოების გარანტიები და ნეიტრალიტეტი, ჩვენი სახელმწიფოს არაბირთვული სტატუსი. ჩვენ მზად ვართ ამაზე წავიდეთ. ეს არის ყველაზე მნიშვნელოვანი პუნქტი. რამდენადაც მახსოვს, ეს იყო რუსეთისთვის ყველაზე პრინციპული პუნქტი. ამის გამო ომი დაიწყეს”, – განაცხადა ზელენსკიმ ინტერვიუში.
ამასთან, ზელენსკიმ ინტერვიუში ხაზი გაუსვა, რომ ახალი შეთანხმება სერიოზული უნდა იყოს და არა ბუდაპეშტის მემორანდუმის მსგავსი უბრალო ფურცელი. უკრაინის პრეზიდენტმა აღნიშნა, რომ უსაფრთხოების გარანტიებსა და ქვეყნის ნეიტრალურ სტატუსზე გადაწყვეტილების მიღება მხოლოდ რეფერენდუმის გზითაა შესაძლებელი, რადგან კონსტიტუციაში მსგავს ცვლილებას მინიმუმ ერთი წელი დასჭირდება.
ცნობისათვის, რუსეთის ჯარის უკრაინაში შესვლიდან უკვე 32 დღე გავიდა. ბოლო მონაცემებით ორივე მხარეს არის ათასობით მსხვერპლი. უკრაინას უკვე ჰყავს 3 მილიონზე მეტი ლტოლვილი. რუსეთს უკრაინაში შეღწევის გამო აშშ-მ, ევროკავშირის ქვეყნებმა, გაერთიანებულმა სამეფომ, იაპონიამ და ავსტრალიამ სანქციები დაუწესა.
