“შეიქმნას კანონი რა ტიპის პროდუქციის ტრანზიტია აკრძალული საქართველოდან რუსეთის მიმართულებით” – გიორგი ვაშაძე

(ACCnews) „სტრატეგია აღმაშენებლის“ ლიდერი “ამკრძალავი ნორმების პაკეტის” შექმნას ითხოვს.

გიორგი ვაშაძე პრემიერ-მინისტრს და მმართველი პარტიის თავმჯდომარეს მიმართავს შეიქმნას კანონი და კანონქვემდებარე აქტები, რათა ყველა მებაჟემ და მესაზღვრემ იცოდეს რა ტიპის პროდუქციის ტრანზიტია აკრძალული საქართველოდან რუსეთის მიმართულებით.

როგორც ვაშაძე განმარტავს, ამით, რუსეთისთვის სანქციების გვერდის ავლასთან დაკავშირებული ყველა  საკითხი დაიხურება.

„პაკეტით გაწერილი უნდა იყოს, როგორ ვკრძალავთ საქართველოს გავლით სანქცირებული პროდუქციის ტრანზიტს. საქართველოში არ არსებობს, ყოველ შემთხვევაში ჩვენთვის არ არის ხელმისაწვდომი არც ერთი ნორმა, რომლითაც აკრძალული იქნება აკრძალული პროდუქციის ტრანზიტი საქართველოს გავლით რუსეთში. იმისთვის, რომ ყველა კითხვის ნიშანი საქართველოსთან დაკავშირებით მოიხსნას, აუცილებელია შეიქმნას კანონი და კანონქვემდებარე აქტები, რომ ყველა მებაჟემ, მესაზღვრემ, საჯარო მოხელემ, პოლიციელმა იცოდეს, რა ტიპის პროდუქციის ტრანზიტია აკრძალული, გამოვლენის შემთხვევაში, რა რეაგირებას ახდენს შესაბამისი ორგანოები, რომ დასავლეთის პარტნიორობის მყარი სტატუსი შეინარჩუნოს საქართველომ და კითხვები არ არსებობდეს.

რაც მთავარია, ჩვენი მშვიდობა და უსაფრთხოება იყოს გარანტირებული, რადგან გზა ამისკენ არის მხოლოდ დასავლეთთან თანამშრომლობა,“ – განაცხადა ვაშაძემ.