“დიდი შვიდეულის” ქვეყნები რუსეთის ეკონომიკის სრულ იზოლაციაში მოქცევას ეცდებიან” – თეთრი სახლი

(ACCnews) “G7 რუსეთის ელიტის წინააღმდეგ სანქციებს გაამკაცრებს,” – ამის შესახებ “დიდი შვიდეულის” ლიდერებმა ვოლოდიმირ ზელენსკისთან გამართული ვიდეოკონფერენციის შემდეგ განაცხადეს.

ამასთან, მათივე განცხადებების თანახმად, უახლოეს მომავალში “დიდი შვიდეულის” ქვეყნები რუსეთის ეკონომიკის სრულ იზოლაციაში მოქცევას ეცდებიან.

როგორც თეთრი სახლის მიერ გავრცელებულ ინფორმაციაში ვკითხულობთ, აღნიშნულ შეხვედრაზე “დიდი შვიდეულის” ლიდერებმა პირობა დადეს, რომ მალე რუსულ ენერგორესურსებზე დამოკიდებულებას ეტაპობრივად, მათ შორის რუსული ნავთობის აკრძალვით შეაჩერებენ.

“ჩვენ გავაგრძელებთ და გავაძლიერებთ კამპანიას რუსეთის ელიტებისა და მათთან დაახლოებული პირების წინააღმდეგ, რომლებიც პრეზიდენტ პუტინის საომარ მოქმედებებს უკრაინაში მხარს უჭერენ და ომში რუსი მოქალაქეების რესურსებს ფლანგავენ”. – ვკითხულობთ თეთრი სახლის განცხადებაში.

ცნობისთვის, ცოტა ხნის წინ ამერიკის შეერთებული შტატების პრეზიდენტის ადმინისტრაციამ ინფორმაცია გაავრცელა, რომლის თანახმადაც,  აშშ სამ რუსულ სამთავრობო ტელევიზიასა და გაზპრომბანკის 27 აღმასრულებელ ხელმძღვანელს სანქციებს უწესებს.