(ACCnews) აშშ-ის საელჩო საქართველოში აგრძელებს იმ ძალისხმევის მხარდაჭერას, რომელიც ნატოსა და ევროკავშირის ცენტრებისა თუ სხვა მრავალი ორგანიზაციის მეშვეობით საქართველოში ხორციელდება.
“უკრაინაში რუსეთის ომმა მთელ მსოფლიოს უჩვენა, როგორ შეუძლია დეზინფორმაციას ადამიანების შეცდომაში შეყვანა. ყველამ ვიხილეთ ინტერვიუები რუსეთის რიგით მოქალაქეებთან, რომლებიც გაუაზრებლად იმეორებენ კრემლის ნარატივს და ამტკიცებენ, რომ რუსეთის არმია უკრაინელ ხალხს „ათავისუფლებს”. ჩვენ, იმ ხალხმა, რომელიც მედიის ცენზურისგან თავისუფალ საზოგადოებაში ვცხოვრობთ, ვნახეთ, როგორ გამოიყურება ეს გათავისუფლება: ათასობით მოკლული სამოქალაქო პირი, მილიონობით დევნილი და განადგურებული ქალაქები” – ამ ინფორმაციას აშშ საელჩო, სოციალურ ქსელში, საკუთარ გვერდზე ავრცელებს.
“ნატოს დღეს, გვსურს, აღვნიშნოთ ნატოსა და ევროკავშირის შესახებ საინფორმაციო ცენტრის მუშაობა, რომელიც მრავალი წელია დეზინფორმაციას ებრძვის. თერთმეტი ადგილმდებარეობის მქონე ამ ქსელმა ნატოსა და ევროკავშირზე ინფორმაცია სემინარებით, გამოკითხვებით, ვირტუალური პროგრამებითა და ასობით აქტივობით საქართველოში ათასობით ადამიანს მიაწოდა და მათ დეზინფორმაციისადმი წინააღმდეგობის გაწევის უნარი გაუჩინა”. – ვკითხულობთ საელჩოს გვერდზე.
