“ჩვენი გაცვლითი პროგრამების მონაწილეებისგან ყოველთვის ველით, რომ მიღებულ ცოდნას თავისი ქვეყნის სასიკეთოდ გამოიყენებენ. ხანდახან ისეც ხდება, რომ ამ ცოდნის გაზიარება ჩვენი კურსდამთავრებულის მოწოდებად იქცევა”, – ინფორმაციას ამის შესახებ საქართველოში შეერთებული შტატების საელჩო, სოციალურ ქსელში, საკუთარ გვერდზე ავრცელებს.
ფილოლოგიის დოქტორმა და ინგლისური ენის მასწავლებელმა თიკო ვარდიძემ პირველად 2013 წელს მიიღო პროგრამაში მონაწილეობა და მას შემდეგ სამცხე-ჯავახეთის რეგიონის ახალგაზრდებს გზას უკვალავს, რომ მსგავსი შესაძლებლობა მათაც მიეცეთ.
“აშშ-ში სწავლასთან დაკავშირებული კონსულტაციებითა თუ ინგლისური ენის სწავლების არაერთი გამარჯვებული პროექტით თიკოს დადებითი გავლენა მთელ რეგიონზე ვრცელდება. მისი საქმიანობის ვრცელ სიას წელს სოციალურად დაუცველი მოსწავლეებისთვის ინგლისური ენის სწავლებაც დაემატა.
აშშ-საქართველოს 30-წლიანი პარტნიორობის აღსანიშნავი ტურნეს ფარგლებში მალე აშშ-ის ელჩი საქართველოში კელი დეგნანი სამცხე-ჯავახეთის რეგიონს ეწვევა. მანამდე, თიკოს მსგავსად, ამ რეგიონში ჩვენი პროგრამების რამდენიმე მონაწილეს კიდევ გაგაცნობთ”, – ვკითხულობთ გვერდზე.
