(ACCnews) “ამ პროცესის ზედმეტად შეფერხება იწვევს შეშფოთებას და აჩენს დამატებით კითხვებს,” – განაცხადა აშშ-ის ელჩმა საქართველოში, კელი დეგნანმა, რითაც მიხეილ სააკაშვილის სასამართლო პროცესის გადადებას გამოეხმაურა.
აშშ-ის ელჩი ამბობს, რომ შტატები ყოფილი პრეზიდენტის საქმეს ყურადღებით აკვირდება.
“ვაკვირდებით მიხეილ სააკაშვილის ირგვლივ არსებულ სიტუაციას და მისი ჯანმრთელობის მდგომარეობას. ასეთ მოცემულობაში სასამართლო პროცესის გადადება მოულოდნელი იყო, საქმე ეხება ადამიანის ჯანმრთელობის მდგომარეობას და მის კეთილდღეობას. აქამდეც აღვნიშნავდით და ახლაც აღვნიშნავთ, მთავრობის პასუხისმგებლობაა რომ მან მიიღოს შესაბამისი და საჭირო სამედიცინო დახმარება, მისი ფსიქოლოგიური და ფიზიკური სიჯანსაღისთვის. ამ პროცესის ზედმეტად შეფერხება იწვევს შეშფოთებას და აჩენს დამატებით კითხვებს,” – განაცხადა დეგნანმა.
ცნობისთვის, საქართველოს ყოფილი პრეზიდენტის მიხეილ სააკაშვილის სასჯელის გადავადებასთან დაკავშირებული პროცესი 22 დეკემბრამდე გადაიდო.
გადაწყვეტილება თბილისის საქალაქო სასამართლოს მოსამართლე გიორგი არევაძემ მიიღო.
“21-ში შეგნებულად არ ვნიშნავთ. არ მინდა სხვანაირი ინტერპრეტაცია მიეცეს,” – განმარტა მოსამართლემ.
ინფორმაციისთვის, 21 დეკემბერს მიხეილ სააკაშვილის დაბადების დღეა.
მიხეილ სააკაშვილმა დღესვე, შიმშილობა დაიწყო.
