(ACCnews) ევროკომისიის ვიცე-პრეზიდენტის, ჯოზეფ ბორელის განცხადებით, უკრაინაში ომი ახალ ფაზაში შევიდა, რისთვისაც მოკავშირეებმა დახმარება უფრო უნდა გააძლიერონ.
როგორც ბორელმა ევროპარლამენტში სიტყვით გამოსვლისას განაცხადა, ევროკავშირის მხარდაჭერა უკრაინის მიმართ არის ურყევი და უკრაინის ბედი მათ მომავალზეც აისახება.
„უკრაინა შეტევაზე გადადის. ომი ახალ ფაზაში შევიდა. უდავოდ, სახიფათო ფაზაა, ვინაიდან საშინელ სცენარში ვართ, რაზეც თვალი არ უნდა დავხუჭოთ. ეს არის კონვენციური ომის სცენარი, ატომური სახელმწიფოს მონაწილეობით, რომელიც ამ მომენტში ჩვეულებრივ სცენარს შორდება და ატომური იარაღის განთავსებით იმუქრება. ეს მართლაც შემაშფოთებელი სცენარია და ჩვენ უნდა ვაჩვენოთ, რომ უკრაინისადმი ჩვენი მხარდაჭერა არ სუსტდება”, – განაცხადა ბორელმა.
ბორელის თქმით, უკრაინა ევროკავშირის წევრი უნდა გახდეს, ხოლო ეს მაშინ იქნება მიღწეული, როცა დასავლეთის ქვეყნები აღარ იქნებიან დამოკიდებული რუსეთზე.
„ვლადიმერ პუტინი იმედოვნებს, რომ სიცივე და გაზის მიწოდების შეწყვეტა, მაღალი ფასები და დაბალი ტემპერატურა ძირს გამოუთხრის ჩვენს ნებას, გავაგრძელოთ უკრაინის მხარდაჭერა. ჩვენ უნდა ვაჩვენოთ, რომ უკრაინისადმი ჩვენი მხარდაჭერა არ სუსტდება.
ჩვენ ახლა მკაფიო პოლიტიკა გვაქვს უკრაინის მიმართ. ჩვენი ნებაა, უზრუნველვყოთ, რომ უკრაინა შემოუერთდეს ევროკავშირს, რაც ამ პოლიტიკის მკაფიო მიზანია. ეს შესაძლებელი იქნება, როდესაც ჩვენ აღარ ვიქნებით ასე დამოკიდებული რუსეთზე“, – განაცხადა ჯოზეფ ბორელმა.
