(ACCnews) “გადაგვიყვანონ მესამე სახელმწიფოს ტერიტორიაზე” – მარიუპოლში მყოფი 36-ე საზღვაო ქვეითი ბრიგადის მეთაური სერგეი ვოლინა სოციალურ ქსელში მსოფლიო ლიდერებს მიმართავს.
„შესაძლოა მხოლოდ რამდენიმე დღე ან საათი გვქონდეს დარჩენილი. მტერი 10-ჯერ მეტია. სამხედრო გარნიზონში 500-ზე მეტი დაჭრილი ჯარისკაცია. მივმართავთ და მოვუწოდებთ მსოფლიოს ყველა ლიდერს, დაგვეხმარონ. ვთხოვთ მათ, გადაგვიყვანონ მესამე სახელმწიფოს ტერიტორიაზე,“- აღნიშნა სერგეი ვოლინამ.
ამასთან, 36-ე საზღვაო ქვეითი ბრიგადის მეთაურმა აღნიშნა, რომ ჯარისკაცების გარდა „აზოვსტალის“ ტერიტორიაზე ასობით მშვიდობიანი მოქალაქე, მათ შორის ქალები და ბავშვები, იმყოფება.
ცნობისათვის, მარიუპოლში აზოვსტალის ქარხანა გუშინ დაბომბეს. გავრცელებული ინფორმაციით ნანგრევების ქვეშ “აზოვსტალის” ქარხნის ბუნკერში უამრავი ადამიანია მოყოლილი.
შეგახსენებთ, რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო.
პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ “უკრაინული აგრესიის” მოგერიებაში.
რუსეთის სამხედრო ძალები უკრაინას სხვადასხვა მიმართულებით უტევენ. პარალელურად, მსოფლიოს ქვეყნები რუსეთს სხვადასხვა სახის სანქციას უწესებენ.
მარიუპოლი აზოვის ზღვაზე მდებარე საპორტო ქალაქია, რომელსაც თვეზე მეტია რუსი ოკუპანტები აკონტროლებენ. ყველაზე მძიმე სურათი მარიუპოლშია, სადაც მთლიანად განადგურებულია ინფრასტრუქტურა. დაღუპულების ზუსტი რაოდენობის დადგენა ვერ ხერხდება. მარიუპოლის მერი და მისი მოადგილე აცხადებენ, რომ ქალაქში არსებული ვითარება გაუსაძლისია და მოქალაქეები გაუწყლოებით იღუპებიან.
მარიუპოლი მდებარეობს დონბასის რეგიონში, სადაც მოსკოვის მხარდაჭერილი სეპარატისტები რვა წლის განმავლობაში ებრძვიან უკრაინის სამხედროებს. ქალაქის დაკავება რუსეთს ყირიმის ნახევარკუნძულზე სახმელეთო დერეფანს მისცემს.
