(ACCnews) თბილისის ყოფილი მერი გიგი უგულავა თანამოაზრე პოლიტიკოსებს ახალი ინიციატივით მიმართავს. უგულავა ოპოზიციონერ კოლეგებს სთავაზობს, ნებისმიერი განცხადების გაკეთება რუსთავის ციხიდან მოხდეს და მიხეილ სააკაშვილის გათავისუფლების მოთხოვნით დასრულდეს.
„მეგობრებო, თანამოაზრე პოლიტიკოსებო და ტელევიზიით ხშირად მოსაუბრენო, მინდა ასეთი იდეა (challenge) გაგიზიაროთ: ყოველი სატელევიზიო ჩართვა, პარტიული ბრიფინგი გავმართოთ რუსთავის ციხიდან; ყოველი გამოსვლა, სულ რომ ამინდზე, ტრიგონომეტრიაზე ან მფრინავ სპილოებზე გვიწევდეს, საუბარი დავიწყოთ და დავასრულოთ მიხეილ სააკაშვილის განთავისუფლების მოთხოვნით. მეტიც თავად ციხის ფონზე საუბარი უკვე მეტყველი გზავნილია -თავისუფლება მიშას,“- წერს გიგი უგულავა სოციალურ ქსელში.
ქალაქის ყოფილი მერი მიიჩნევს, რომ ასეთი მხარდაჭერა დიდი მნიშვნელობის შეიძლება იყოს სააკაშვილის ციხიდან დახსნის საქმეში.
„მესმის, ლოჯისტიკურად შესაძლოა რთულია, მათ შორის ტელევიზიებისთვისაც. სახლიდან, სტუდიიდან გაცილებით მოსახერხებელია საუბარი. დრო, საწვავი და ნერვები ნაკლებად იხარჯება, მაგრამ ვფიქრობ, რომ ეს თუნდაც მცირედი ძალისხმევა ძალიან მნიშვნელოვანია პუტინისა და ივანიშვილის ტყვის მიხეილ სააკაშვილის, დასახსნელად. მნიშვნელოვანია პატიმრის გასამხნევებლად, მნიშვნელოვანია ამ უსამართლო და ისტორიული სირცხვილის ჩამოსარეცხად, მნიშვნელოვანია რომ ეს თემა მუდმივად იყოს დღის წესრიგში, სანამ არ მივაღწევთ მიზანს.
ერთი მერცხალი გაზაფხულს ვერ მოიყვანს, მაგრამ თუ ბევრნი დავნერგავთ ამ ძალისხმევას, მე დარწმუნებული ვარ რომ ის ამაოდ არ ჩაივლის,“- წერს უგულავა.
ცნობისათვის, საქართველოს მესამე პრეზიდენტი მიხეილ სააკაშვილი უკვე მეშვიდე თვეა პატიმრობაში იმყოფება. პროკურატურა სააკაშვილს რამდენიმე გახმაურებულ საქმეზე ედავება. მხარდამჭერები და ოპოზიციური პარტიების წარმომადგენლები ექსპრეზიდენტის გათავისუფლებას ითხოვენ.
