(ACCnews) აუდიტის სამსახურის ყოფილ ხელმძღვანელს, ლაშა თორდიას ამერიკის შეერთებულმა შტატებმა პოლიტიკური დევნილის სტატუსი მიანიჭა. ინფორმაციას თავად ლაშა თორდია სოციალურ ქსელში ავრცელებს.
„ოთხ წლიანი პროცესის ბოლოს მომენიჭა პოლიტიკური დევნილის სტატუსი! პერსონალური მადლობა ეკა ეგუტიას და ნინია პატარაიას. Ek law office საუკეთესო საადვოკატო კომპანია“, – წერს თორდია სოციალურ ქსელში.
შეგახსენებთ, რომ ლაშა თორდიამ საქართველო, თბილისის საქალაქო სასამართლოს მიერ ყოფილი პროკურორის, ოთარ ფარცხალაძის გამართლების შემდეგ დატოვა.
საქმე ეხება 2017 წლის მაისში რესტორან “ელ ცენტროში” მომხდარ ამბავს. ლაშა თორდიას განცხადებით, ფარცხალაძე მას ათობით ადამიანის თვალწინ დაესხა თავს. რადგან იმ პერიოდში აუდიტის სამსახური ყოფილი მთავარი პროკურორის კომპანიასა და თბილისის მერიას შორის გარიგების დეტალებს იკვლევდა.
სასამართლომ ოთარ ფარცხალაძე უდანაშაულოდ ცნო. სასამართლოს გადაწყვეტილებით, ამ საქმეზე დამნაშავედ იქნა ცნობილი ფინანსთა სამინისტროს საგამოძიებო სამსახურის ყოფილი თანამშრომელი, მიხეილ ჩოხელი. მას 5000-ლარიანი ჯარიმა დაეკისრა.
