(ACCnews) უკრაინა ამერიკის შეერთებული შტატებისგან ელის გადაწყვეტილებას, აღიაროს რუსეთის ფედერაცია ტერორიზმის სახელმწიფო სპონსორად. ამის შესახებ უმაღლეს რადას ხელმძღვანელმა რუსლან სტეფანჩუკმა განაცხადა.
„ვფიქრობ, რომ ევროპარლამენტის გადაწყვეტილება (რუსეთის ფედერაციის ტერორიზმის სპონსორად აღიარების შესახებ – რედ.) იქნება დიდი კატალიზატორი მსოფლიოს მრავალი ქვეყნისთვის. რა თქმა უნდა, ჩვენ ველოდებით ასეთ გადაწყვეტილებას, პირველ რიგში, ამერიკის შეერთებული შტატებიდან. ჩვენ ვიცით, რომ ეს არის ხანგრძლივი დისკუსია და ჩვენ დიდი იმედი გვაქვს, რომ ასეთი სტატუსი – ან შესაძლოა სხვა სპეციალური სტატუსი – მიენიჭება რუსეთის ფედერაციას“, – განაცხადა სტეფანჩუკმა.
რადას ხელმძღვანელმა აღნიშნა, რომ ტერორიზმის სპონსორის სტატუსი სამართლებრივ შედეგებს გამოიწვევს.
ამასთან, მან გამოთქვა მოსაზრება, რომ რუსეთის ფედერაციის ევროპარლამენტის მიერ ტერორიზმის სახელმწიფო სპონსორად აღიარება გადამწყვეტი იქნება ანტირუსული სანქციების მეცხრე პაკეტის სიის ფორმირებაში.
შეგახსენებთ, 23 ნოემბერს ევროპარლამენტმა რუსეთის ფედერაცია ტერორიზმის სახელმწიფო სპონსორად აღიარა.
