(ACCnews) “თუ ნატო-ში არ გავწევრიანდებით, ძალიან დაუცველ მდგომარეობაში ვიქნებით,” – ამის შესახებ შვედეთის პრემიერ-მინისტრმა, მაგდალენა ანდერსონმა დღეს პრესკონფერენციაზე განაცხადა.
ასევე, როგორც შვედეთის პრემიერ-მინისტრმა პრესკონფერენციაზე განაცხადა, ნატოში გაწევრიანებით შვედეთი მიაღწევს მეტ უსაფრთხოებას და ასევე ქვეყანაც, თავის მხრივ, ხელს შეუწყობს უსაფრთხოების გაძლიერებას.
“ჩვენ ძალიან დაუცველ მდგომარეობაში ვიქნებით. ჩვენ “სოციალ-დემოკრატებს” მიგვაჩნია, რომ შვედეთისა და შვედი ხალხის უსაფრთხოებისთვის საუკეთესოა ნატო-ში გაწევრიანება. ეს არის გადაწყვეტილება, რომელიც ჩვენ მივიღეთ ძალიან ფრთხილი განხილვის შემდეგ. ამით შვედეთი იქნება უსაფრთხოების უზრუნველმყოფელი,” – განაცხადა მადლენა ანდერსონმა პრესკონფერენციაზე.
ამასთან, შვედეთის პრემიერ-მინისტრის განცხადებით, ქვეყანა უნდა მოერგოს რეალობას და მიიღოს გადაწყვეტილებები არსებული პოლიტიკური კლიმატიდან გამომდინარე.
ძალიან ნათელია, რომ არსებობს რეალობა 2022 წლის 24 თებერვლამდე და მის შემდეგ. ევროპა, შვედეთი და შვედი ხალხი ცხოვრობენ ახალ, სახიფათო რეალობაში. ევროპული უსაფრთხოების წესრიგი, რომელზეც შვედეთი საკუთარ უსაფრთხოების პოლიტიკას საუკუნეების მანძილზე აფუძნებს, თავდასხმის ქვეშაა,” – განაცხადა შვედეთის პრემიერ-მინისტრმა.
შეგახსენებთ, რომ დღეს, ბერლინში ნატოს წევრი ქვეყნების საგარეო საქმეთა მინისტრების შეხვედრა გაიმართა, სადაც მინისტრებმა უკრაინისთვის მხარდაჭერასა და მადრიდის სამიტზე მისაღებ კონცეფციაზე იმსჯელეს. ამასთან, მინისტერიალის პირველ დღეს დიპლომატები შეხვდნენ კოლეგებს ფინეთიდან და შვედეთიდან. ამავე შეხვედრაზე ფინეთმა ოფიციალურად განაცხადა, რომ ნატოს წევრობაზე განაცხადს წარადგენს.
