(ACCnews) აშშ-ის სენატის საგარეო ურთიერთობათა კომიტეტმა რეზოლუცია მიიღო, რომლის თანახმადაც, რუსეთის ქმედება უკრაინის წინააღმდეგ გენოციდად არის აღიარებული.
აღნიშნული რეზოლუცია რუსეთს გმობს, უკრაინელი ხალხის წინააღმდეგ ჩადენილი გენოციდის გამო და აშშ-ს მოუწოდებს, ნატოსა და ევროკავშირთან თანამშრომლობით მიიღოს ზომები უკრაინის მთავრობის მხარდასაჭერად, რათა აღიკვეთოს რუსეთის მხრიდან გენოციდის შემდგომი აქტები.
“რეზოლუცია გმობს უკრაინელი ხალხის წინააღმდეგ აქტიურ გენოციდს, მოუწოდებს აშშ-ის ხელისუფლებას, ითანამშრომლოს ჩვენს მოკავშირეებთან, რათა აღვკვეთოთ გენოციდის მომავალი აქტები. ასევე, მხარს უჭერს გამოძიებას, რათა ამ საშინელ დანაშაულებზე პასუხისმგებლები მართლმსაჯულების წინაშე წარდგნენ. ჩვენ მომავალშიც ყველაფერი უნდა გავაკეთოთ, რათა მხარი დავუჭიროთ უკრაინელ ხალხს გადარჩენისთვის ბრძოლაში,” – ნათქვამია რეზოლუციაში.
ცნობისთვის, აშშ-ის სენატის საგარეო ურთიერთობათა კომიტეტის მიერ მხარდაჭერილი რეზოლუციის ავტორები არიან რესპუბლიკელი და დემოკრატი სენატორები ჯიმ რიში და ბენ კარდინი.
