“უკრაინა დანაშაულის ადგილია” – ჰააგის პროკურორი

(ACCnews) ბუშაჩი ყოფნისას პროკურორმა კარიმ ხანიმ განაცხადა, რომ უკრაინა დანაშაულის ადგილია და სიმართლე აუცილებლად დადგინდება.

“უკრაინა დანაშაულის ადგილია. ჩვენ აქ ვიმყოფებით, რადგან გვაქვს გონივრული საფუძველი, გვჯეროდეს, რომ აქ ჩაიდინეს დანაშაულები, რომელიც სისხლის სამართლის საერთაშორისო სასამართლოს იურისდიქციაში შედის. ჩვენ უნდა გავფანტოთ ომის ნისლი, რათა სიმართლეს მივაკვლიოთ. ეს კი დამოუკიდებელ და მიუკერძოებელ გამოძიებას საჭიროებს“, – წერს კარიმ ხანი.

ცნობისთვის, რამდენიმე დღის წინ ქალაქი ბუჩა უკრაინულმა არმიამ რუსი დამპყრობლებისგან გაათავისუფლა. ქალაქის გათავისუფლების შემდეგ უკრაინულმა მხარემ ბუჩაში მშვიდობიანი მოქალაქეების ცხედრები იპოვეს. საერთაშორისო მედია-სააგენტოების ფოტო-რეპორტაჟებში ჩანს ქუჩებში მიმოფანტული მოკლული ადამიანები. ჟურნალისტების და უკრაინის ხელისუფლების წარმომადგენელთა ინფორმაციით კი ზოგიერთ მოკლულს ხელები შეკრული ჰქონდა.

შეგახსენებთ, რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო.

პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ “უკრაინული აგრესიის” მოგერიებაში.

რუსეთის სამხედრო ძალები უკრაინას სხვადასხვა მიმართულებით უტევენ. პარალელურად, მსოფლიოს ქვეყნები რუსეთს სხვადასხვა სახის სანქციას უწესებენ.