(ACCnews) უკრაინაში რუსულმა ძალებმა მარცვლეულის რამდენიმე საცავი გაანადგურეს, რასაც აშშ-ის ხელისუფლების ხელთ არსებული ფოტოსურათებიც მეტყველებს. ინფორმაციას სააგენტო „როიტერი“ ავრცელებს.
სააგენტოსთან ამერიკელი მაღალჩინოსანი აცხადებს, რომ რუსი სამხედროები დარტყმებს უკრაინის აღმოსავლეთ ნაწილში მდებარე საცავებზე ახორციელებენ. მისი ცნობით, დარტყმების შედეგად დაზიანებულია მარცვლეულის სულ მცირე ექვსი საცავი.
მაღალჩინოსნის ტქმით, „მარცვლეულის ამ საცავებზე რუსეთის უგუნური თავდასხმა იმის ნათელი მაგალითია, რომ პუტინის ომი პირდაპირ აზარალებს უკრაინაში მოქალაქეებს და საფრთხეს უქმნის მსოფლიოში სასურსათო უსაფრთხოებას.”
“აფრიკისა და ახლო აღმოსავლეთის ქვეყნები დამოკიდებული არიან უკრაინიდან ხორბლის ექსპორტზე, სურსათის ამ მარაგებისა და საწყობების განადგურებამ შესაძლოა, გამოიწვიოს დეფიციტი და ფასების ზრდა ისედაც მოწყვლადი ეკონომიკის ქვეყნებში“– აცხადებს ამერიკელი მაღალჩინოსანი სააგენტოსთან.
2020-2021 წლებში უკრაინა მსოფლიოში ხორბლის სიდიდით მეოთხე ექსპორტიორი იყო.
