“სააკაშვილი არის გასათავისუფლებელი, როგორც ჯანმრთელობის მდგომარეობის, ისე იმის გამო, რომ ის პოლიტიკურად დევნილია”- ზურაბ ჯაფარიძე

(ACCnews) „გირჩი – მეტი თავისუფლების“ ლიდერი ზურაბ ჯაფარიძე მიიჩნევს, რომ ყოფილი პრეზიდენტი მიხეილ სააკაშვილი ჯანმრთელობის  მდგომარეობის გამო უნდა გათავისუფლდეს, თუმცა დასძენს, რომ ამ ნაბიჯს “ქართული ოცნება” არ გადადგამს.

როგორც ჯაფარიძე აცხადებს, მოსალოდნელი იყო, რომ  „ქართული ოცნება“ არ გაითვალისწინებდა, მათ შორის, არც უცხოელი ექსპერტების დასკვნას.

„მიხეილ სააკაშვილი არის გასათავისუფლებელი, როგორც ჯანმრთელობის  მდგომარეობის, ისე იმის გამო, რომ არის პოლიტიკურად დევნილი. მოსალოდნელი იყო, რომ „ქართული ოცნება“ არ გაითვალისწინებდა, მათ შორის, არც უცხოელი ექსპერტების დასკვნას. ამაში ახალი არაფერია. მიხეილ სააკაშვილი არის გასათავისუფლებელი, როგორც ჯანმრთელობის  მდგომარეობის, ისე იმის გამო, რომ არის პოლიტიკურად დევნილი.

„ქართული ოცნება“ ამ ნაბიჯის გადამდგმელი არ არის, რადგან სხვანაირი მენტალიტეტის ხალხია. ისინი მიიჩნევენ, რომ ეს იქნება უკან დახევა და სისუსტის ჩვენება. ამ ნაბიჯს არ გადადგამენ, სანამ მეორე მხარეს არ იქნება ანგარიშგასაწევი ძალა, რომელიც აიძულებს, რომ ეს ნაბიჯი გადადგას. ამ ძალის შექმნას სჭირდება ოპოზიციურ ფლანგზე დიდი ერთობა“, – აღნიშნავს „გირჩი – მეტი თავისუფლების“ ლიდერი.