(ACCnews) “რუსები თავიანთი სამხედროების ცხედრებისთვის ნაგვის ტომრებს გვთავაზობდნენ,” – ამის შესახებ უკრაინის პრეზიდენტმა, ვოლოდიმირ ზელენსკიმ ჟურნალისტებთან საუბრის დროს განაცხადა.
ზელენსკის განცხადებით, გასაგებია თუ რისთვის იბრძვის უკრაინა, მაგრამ მისთვის გაუგებარია თუ რა ხდება რუსეთში.
“სჭირდებათ საერთოდ [თავიანთი გარდაცვლილი სამხედროების სიები]? იქ უბრალოდ ბავშვები არიან, 2003-2004 წლებში დაბადებულები. არსებობს სპეციალური პროცესი, ჩვენ არ გვინდა მათი ცხედრები აქ გვყავდეს. რუსები ჯერ უარს ამბობდნენ, მერე კიდე რაღაცას იგონებდნენ, მერე რაღაც ტომრებს გვთავაზობდნენ. ვერ ვხვდები, როცა ძაღლი ან კატა კვდება, იმასაც კი არ ექცევიან ასე. ნაგვის პარკებს [გვთავაზობდნენ]…რატომაა ეს საშინელება? თუ თავიანთ ხალხს ასე ექცევიან, როგორი დამოკიდებულება ექნებათ სხვების მიმართ? და რუსეთის ხელისუფლებისთვის ჩვენ ნამდვილად – სხვები ვართ. უკრაინა გასაგებია რისთვის იბრძვის, მაგრამ რა ხდება რუსეთში ამას ვერ ვხვდები,” – განაცხადა უკრაინის პრეზიდენტმა.
ინფორმაციისთვის, ომის დაწყების შემდეგ უკრაინულმა მხარემ რუსეთს არაერთხელ შესთავაზე გარდაცვლილი სამხედროების წაყვანა.
ცნობისათვის, რუსეთის ჯარის უკრაინაში შესვლიდან უკვე 32 დღე გავიდა. ბოლო მონაცემებით ორივე მხარეს არის ათასობით მსხვერპლი. უკრაინას უკვე ჰყავს 3 მილიონზე მეტი ლტოლვილი. რუსეთს უკრაინაში შეღწევის გამო აშშ-მ, ევროკავშირის ქვეყნებმა, გაერთიანებულმა სამეფომ, იაპონიამ და ავსტრალიამ სანქციები დაუწესა.
