(ACCnews) აშშ-ის თავდაცვის მდივნის მოადგილე პოლიტიკის საკითხებში კოლინ კალი აცხადებს, რომ რუსეთი უკრაინაში შეჭრას და საომარი მოქმედებების დაწყებას ინანებს.
მისი თქმით, რუსეთი უკრაინიდან ეკონომიკურად, პოლიტიკურად და გეოპოლიტიკურად უფრო სუსტი გამოვა, ვიდრე აქამდე იყო.
”რუსეთი ინანებს უკრაინაზე თავდასხმის განხორციელების გადაწყვეტილებას. დარწმუნებით ვფიქრობ, რომ რუსეთი უკრაინიდან უფრო სუსტი გამოვა, ვიდრე ის კონფლიქტის დაწყების დროს იყო. ის იქნება სამხედრო თვალსაზრისით, ეკონომიკურად, პოლიტიკურად და გეოპოლიტიკურად უფრო სუსტი და უფრო იზოლირებული“, – აღნიშნა ამერიკელმა მაღალჩინოსანმა.
აშშ-ის თავდაცვის მდივნის მოადგილემ ასევე ხაზი გაუსვა, რომ პენტაგონის თავდაცვის სტრატეგიის მომავალი დოკუმენტი რუსეთს “მწვავე საფრთხედ” გამოაცხადებს.
ცნობისათვის, რუსეთის ჯარის უკრაინაში შესვლიდან უკვე 30 დღე გავიდა. ბოლო მონაცემებით ორივე მხარეს არის ათასობით მსხვერპლი. უკრაინას უკვე ჰყავს 3 მილიონზე მეტი ლტოლვილი. რუსეთს უკრაინაში შეღწევის გამო აშშ-მ, ევროკავშირის ქვეყნებმა, გაერთიანებულმა სამეფომ, იაპონიამ და ავსრტალიამ სანქციები დაუწესა.
