(ACCnews) “უკრაინის გამო კონფლიქტში შეერთებული შტატებისა და ევროპის მზარდი ჩართულობის გამო, რუსეთს მოუწევს საპასუხო ზომების მიღება”, – ამის შესახებ საგარეო საქმეთა მინისტრის მოადგილემ სერგეი რიაბკოვმა განაცხადა.
”რუსეთი იძულებული იქნება მიიღოს ადეკვატური კონტრზომები, მათ შორის ასიმეტრიული ხასიათის”, – ხაზგასმით აღნიშნა რიაბკოვმა.
როგორც რიაბკოვი აცხადებს, დასავლეთის მხრიდან კიევის სამხედრო დახმარება, უკრაინელი ჯარისკაცების წვრთნა ალიანსის წევრი სახელმწიფოების ტერიტორიაზე, უკრაინისთვის სადაზვერვო მონაცემების გადაცემა, თანამგზავრული სურათების რეალურ დროში მიწოდება, საარტილერიო დარტყმების სამიზნეების დადგენა და ოპერაციების დაგეგმვა, სულ უფრო მეტად ჩართულს ხდის დასავლეთის ქვეყნებს კონფლიქტში.
„თვალსაჩინოა, რომ აშშ-თან და ნატო-სთან პირდაპირი დაპირისპირება რუსეთის ინტერესებში არ შედის. ვაფრთხილებთ და იმედი გვაქვს, რომ ვაშინგტონში აცნობიერებენ არაკონტროლირებადი ესკალაციის საშიშროებას“, – განაცხადა სერგეი რიაბკოვმა.
