(ACCnews) შეერთებულმა შტატებმა გააფრთხილა ჩინეთი სერიოზული შედეგების შესახებ, თუ ის რუსეთს მიაწვდის იარაღს ან დაეხმარება სანქციების გვერდის ავლით.
„თუ ჩინეთი მიაწვდის იარაღს და სამხედრო აღჭურვილობას ან შეეცდება დაეხმაროს რუსეთს სანქციების გვერდის ავლით, მაშინ მას სერიოზული შედეგები მოჰყვება არა მხოლოდ ჩვენგან, არამედ ჩვენი მოკავშირეებისა და პარტნიორების მხრიდანაც“, – განაცხადა ნედ პრაისმა.
პრაისმა აღნიშნა, რომ აშშ გააგრძელებს მჭიდროდ მონიტორინგს იმ მხარდაჭერის დონეზე, რომელსაც ჩინეთი უწევს რუსეთის ფედერაციას.
ჩინეთმა არაერთხელ განაცხადა, რომ რუსეთის წინააღმდეგ სანქციები მხოლოდ ამძაფრებს სიტუაციას და მოუწოდებს აშშ-ს, ხელი შეუწყოს მშვიდობას პრაქტიკული ქმედებებით.
უკრაინაში სამხედრო წარუმატებლობის ფონზე, რუსეთი ჩინეთს სთხოვდა სამხედრო და ეკონომიკური დახმარება. თუმცა, რუსეთმაც და პეკინმაც უარყვეს პუტინის ასეთი “სამაშველო” თხოვნის არსებობა.
აშშ-ის პრეზიდენტი ჯო ბაიდენი 18 მარტს ტელეფონით ესაუბრა ჩინეთის პრეზიდენტ სი ძინპინს. შემდეგ ჩინეთის ლიდერმა დაარწმუნა ბაიდენი, რომ ჩინეთი არ იყო დაინტერესებული უკრაინის ომით, რომელიც რუსეთის პრეზიდენტმა ვლადიმერ პუტინმა გააჩაღა.
სამშაბათს, 22 მარტს, აშშ-ის ეროვნული უსაფრთხოების მრჩეველმა ჯეიკ სალივანმა განაცხადა, რომ ამ საუბრის შემდეგ ბაიდენის ადმინისტრაციას არ დაუფიქსირებია ჩინეთის რუსეთისთვის სამხედრო დახმარების გაწევის არც ერთი ფაქტი.
აპრილის დასაწყისში ჩინეთმა დაარწმუნა ევროკავშირი, რომ ის შეეცდებოდა მშვიდობის დამყარებას უკრაინაში, მაგრამ განაცხადა, რომ ამას გააკეთებდა საკუთარი პირობებით, რუსეთზე მეტი ზეწოლის გარეშე.
