(ACCnews) “ნოვაია გაზეტა”-ს ინფორმაციით, ლიბანური ტერორისტული დაჯგუფება ჰეზბოლა უკრაინაში რუსეთის მხარეს საბრძოლველად 800 მებრძოლს გზავნის.
როგორც გამოცემა წერს, უკრაინაში ბრძოლისთვის ჰეზბოლას წევრებს 1 500 დოლარს გადაუხდიან. რუსული კერძო სამხედრო კომპანია ვაგნერის წარმომადგენლებმა ჰეზბოლას მებრძოლებთან რამდენიმე შეხვედრა გამართეს.
მათივე ცნობით, 800 მებრძოლიდან 200 ბელორუსის ერთ-ერთ სამხედრო ბაზაზე 29 მარტს უნდა ჩავიდეს.
ამასთან, როგორც “Новая газета” იტყობინება რუსები ჰეზბოლას მებრძოლებს ყველაზე გამოცდილი ბატალიონებიდან – ალ-აბასიდან და ალ-რადვანიდან იწვევენ. ტერორისტულმა დაჯგუფებამ რეკრუტირების ცენტრები რამდენიმე ქალაქში გახსნა.
ცნობისათვის, რუსეთის ჯარის უკრაინაში შესვლიდან უკვე 32 დღე გავიდა. ბოლო მონაცემებით ორივე მხარეს არის ათასობით მსხვერპლი. უკრაინას უკვე ჰყავს 3 მილიონზე მეტი ლტოლვილი. რუსეთს უკრაინაში შეღწევის გამო აშშ-მ, ევროკავშირის ქვეყნებმა, გაერთიანებულმა სამეფომ, იაპონიამ და ავსტრალიამ სანქციები დაუწესა.
