(ACCnews) ნატო-ს გენერალური მდივნის, იენს სტოლტენბერგის განცხადებით, უსაფრთხოებასთან დაკავშირებული შეშფოთება, რომელიც თურქეთს აქვს ფინეთისა და შვედეთის ნატო-ში გაწევრიანების თაობაზე, ლეგიტიმურია.
როგორც მან ფინეთში ვიზიტისას განაცხადა, თურქეთის შეშფოთება ეხება იარაღის ექსპორტს და ტერორიზმს.
“ეს არის ლეგიტიმური შეშფოთება. ეს ეხება ტერორიზმს, ეს ეხება იარაღის ექსპორტს.
ჩვენ უნდა გვახსოვდეს და გავიგოთ, რომ ნატოს არცერთ მოკავშირეს არ განუცდია იმაზე მეტი ტერორისტული თავდასხმა, ვიდრე თურქეთს“, – დასძინა სტოლტენბერგმა.
სტოლტენბერგის თქმით, თურქეთთან მოლაპარაკებები გაგრძელდება, მაგრამ მოლაპარაკებებში პროგრესის შესახებ არ დაუკონკრეტებია.
სტოლტენბერგმა აღნიშნა, რომ თურქეთი ალიანსის მთავარი მოკავშირეა მისი სტრატეგიული მდებარეობის გამო შავ ზღვაზე ევროპასა და ახლო აღმოსავლეთს შორის.
ცნობისთვის, მას შემდეგ, რაც ფინეთისა და შვედეთის NATO-ში გაწევრიანების საკითხი დღის წესრიგში დადგა, თურქეთის პრეზიდენტმა რეჯეფ თაიფ ერდოღანმა თქვა, რომ თურქეთი ფინეთისა და შვედეთის ალიანსში გაწევრიანებას არ ეთანხმება, რადგან ისინი მხარს უჭერენ ტერორისტულ ორგანიზაციას ქურთისტანის მუშათა პარტიას (PKK).
