(ACCnews) რუსეთ-უკრაინის მოლაპარაკების შემდეგი რაუნდი თურქეთში გაიმართება. შეხვედრა სტამბოლში 29 მარტს არის დაგეგმილი – ინფორმაციას თურქეთის პრეზიდენტის ოფისი ავრცელებს.
თურქეთის პრეზიდენტის კომუნიკაციების დირექტორატის განცხადებაში ნათქვამია, რომ კვირას სატელეფონო საუბრისას, თურქეთის პრეზიდენტი რეჯეფ თაიფ ერდოღანი და მისი რუსი კოლეგა ვლადიმერ პუტინი შეთანხმდნენ, რომ რუსეთისა და უკრაინის დელეგაციების შემდეგი შეხვედრა სტამბოლში გაიმართება”.
ასევე თურქეთის პრეზიდენტის ოფისის ინფორმაციით, ერდოღანმა კრემლის ლიდერს განუცხადა, რომ საჭიროა ცეცხლის შეწყვეტა და უკეთესი ჰუმანიტარული პირობები. მანამდე შეხვედრის თარიღთან დაკავშირებით უკრაინის მმართველი პარტიის საპარლამენტო ფრაქციის ლიდერმა დავით არახამიამ ისაუბრა, რომელმაც აღნიშნა, რომ მოლაპარაკებების მორიგი რაუნდის დროს, რომელიც ვიდეოფორმატში გაიმართა, გადაწყდა, რომ მოლაპარაკებების მორიგი რაუნდი დელეგაციების მონაწილეობით პირისპირ გაიმართება თურქეთში 28-30 მარტს“.
ინფორმაციას მოლაპარაკების თარიღის შესახებ რუსეთის დელეგაციის წარმომადგენელი ვლადიმირ მედინსკიც ადასტურებს.
ცნობისათვის, რუსეთის ჯარის უკრაინაში შესვლიდან უკვე 33 დღე გავიდა. ბოლო მონაცემებით ორივე მხარეს არის ათასობით მსხვერპლი. უკრაინას უკვე ჰყავს 3 მილიონზე მეტი ლტოლვილი. რუსეთს უკრაინაში შეღწევის გამო აშშ-მ, ევროკავშირის ქვეყნებმა, გაერთიანებულმა სამეფომ, იაპონიამ და ავსტრალიამ სანქციები დაუწესა.
