(ACCnews) “ძალადობის შემთხვევის გაშუქებისას მნიშვნელოვანია მედიისა და სამართალდამცავი ორგანოების თანამშრომლობა მსხვერპლის საუკეთესო ინტერესების გათვალისწინებით. ქალთა მიმართ ძალადობის წინააღმდეგ ბრძოლის 16-დღიანი კამპანიის ფარგლებში ამ თემაზე ვუმასპინძლეთ სემინარს, რომელსაც მოწვეული ექსპერტი, სახალხო დამცველის აპარატის სპეციალისტი, ანა ლობჟანიძე ხელმძღვანელობდა”, – ინფორმაციას ამის შესახებ საქართველოში შეერთებული შტატების საელჩო, სოციალურ ქსელში, საკუთარ გვერდზე ავრცელებს.
ტრენინგსა და დისკუსიებში მონაწილეობდნენ შინაგან საქმეთა სამინისტროს, ჯანდაცვის სამინისტროსა და საქართველოს მედიის წარმომადგენლები. სემინარებზე განიხილეს ქალთა მიმართ ძალადობასთან ბრძოლაში მედიის როლი, დისკრიმინაციული და ძალადობის შემცველი მასალის რეგულაცია და ინფორმაციის გაზიარებისას მედიისა და სამთავრობო ორგანიზაციების წინაშე არსებული გამოწვევები.
