(ACCnews) ლვოვის რკინიგზის სადგური დაიბომბა. ინფორმაციას “ტელეგრამის” რამდენიმე არხი ავრცელებს. ინფორმაციას ასევე ადასტურებს ლვოვის მერი ანდრეი სადავოი.
„ხუთი მიზანმიმართული სარაკეტო თავდასხმა ლვოვზე. შესაბამისი უწყებები უკვე გაემართნენ ადგილისკენ. დამატებით ინფორმაციას მოგაწვდით“, – წერს სოციალურ ქსელში ქალაქის მერი.
გავრცელებული ინფორმაციით, სადგური ხალხით სავსე იყო, რადგან მატარებელი რამდენიმე წუთის შესული იყო.
დაშავებულებისა და მსხვერპლის შესახებ ინფორმაცია ჯერჯერობით არ ვრცელდება.
ლვოვის სარკინიგზო სადგური ერთ-ერთი ყველაზე ხალხმრავალი ადგილია, რომელსაც მოქალაქეები ევაკუაციისთვის იყენებენ.
ცნობისთვის, რუსეთის ჯარის უკრაინაში შესვლიდან უკვე 54 დღე გავიდა. ბოლო მონაცემებით ორივე მხარეს არის ათასობით მსხვერპლი. უკრაინას უკვე ჰყავს 4 მილიონზე მეტი ლტოლვილი. რუსეთს უკრაინაში შეღწევის გამო აშშ-მ, ევროკავშირის ქვეყნებმა, გაერთიანებულმა სამეფომ, იაპონიამ და ავსტრალიამ სანქციები დაუწესა.
