(ACCnews) “იმ შემთხვევაში, თუ რუსეთის დარტყმები ენერგეტიკულ ინფრასტრუქტურაზე გაგრძელდება, კიევში შესაძლოა „აპოკალიფსი“ დადგეს, დედაქალაქის მცხოვრებლები ევაკუაციისთვის მზად უნდა იყვნენ”, – ამის შესახებ კიევის მერმა ვიტალი კლიჩკომ Reuters-თან ინტერვიუში განაცხადა.
„კიევმა შესაძლოა დაკარგოს ენერგია და წყალმომარაგება, ასევე სითბო. აპოკალიფსი შეიძლება მოხდეს, როგორც ჰოლივუდურ ფილმებში, როდესაც დაბალი ტემპერატურის გამო სახლებში ცხოვრება შეუძლებელი ხდება. თუმცა, ჩვენ ვიბრძვით და ყველაფერს ვაკეთებთ, რომ ეს არ მოხდეს“, – განაცხადა კლიჩკომ.
მან კიევის მოსახლეობას მოუწოდა მოიმარაგონ საკვები და სასმელი წყალი, ასევე ნივთები და დოკუმენტები ელექტროენერგიის გათიშვის შემდეგ დაუყოვნებლივ ევაკუაციის შემთხვევისთვის. თუმცა, მისი თქმით, ჯერჯერობით ევაკუაცია არ არის საჭირო, რადგან ქალაქში ელექტროენერგიის დეფიციტი მხოლოდ 20%-ია და მდგომარეობა სტაბილურად რჩება“, – წერს გაზეთი.
კლიჩკომ დასძინა, რომ ქალაქი სხვადასხვა რაიონში ამზადებს გათბობის პუნქტებს, მაგრამ ისინი საკმარისი არ არის მთელი მოსახლეობის დასაბინავებლად. ჩვენ მოვამზადეთ 500-მდე ავტონომიური გათბობის პუნქტი, მაგრამ სამმილიონიანი ქალაქისთვის 500 პუნქტი არაფერია“, – განაცხადა მერმა.
