“მოვუწოდებ მოკავშირეებს, თავი დაანებონ ყოყმანს, მიაწოდონ უკრაინას ყველაფერი, რადგან დღეს იარაღი ემსახურება მშვიდობას”- კულება

(ACCnews) უკრაინის საგარეო საქმეთა მინისტრი დმიტრო კულება ნატო-ს ქვეყნებს კიდევ ერთხელ მოუწოდებს, უკრაინას მეტი იარაღი გადასცენ.

როგორც კულებამ ნატო-ს კოლეგებთან შეხვედრის წინ განაცხადა, უკრაინა დარწმუნებულია, რომ რუსეთის დამარცხების საუკეთესო გზა მეტი სამხედრო მხარდაჭერაა.

მან განაცხადა, რომ იარაღის „საკმარისი მარაგის“ გარეშე უკრაინის გამარჯვებას „უზარმაზარი მსხვერპლი“ მოჰყვება.

,,მოვუწოდებ ყველა მოკავშირეს, თავი დაანებონ ყოყმანს, სურვილის ნაკლებობას, მიაწოდონ უკრაინას ყველაფერი, რაც მას სჭირდება, რადგან რაც არ უნდა უცნაურად ჟღერდეს, დღეს იარაღი ემსახურება მშვიდობის მიზანს“, – განაცხადა უკრაინის საგარეო საქმეთა მინისტრმა დმიტრო კულებამ და დასძინა, რომ რაც უფრო მალე მიიღებენ მარაგს, მით მეტი ადამიანის სიცოცხლე, ქალაქები გადარჩება ისეთი განადგურებისგან, როგორიც მსოფლიომ ბუჩაში იხილა.

ცნობისთვის, კულება ნატო-ს საგარეო საქმეთა მინისტრებს ბრიუსელში სამიტზე ხვდება, რათა განიხილონ, თუ როგორ უნდა შეაიარაღონ უკრაინა რუსეთის განახლებული სამხედრო თავდასხმების წინააღმდეგ, რომელიც ქვეყნის აღმოსავლეთშია მოსალოდნელი.