“საქართველოსა და უკრაინის კომპეტენტურ უწყებებს შორის კომუნიკაცია გრძელდება” – ანდრეი კასიანოვი 

(ACCnews) უკრაინის თავდაცვის სამინისტროს დაზვერვის მთავარი სამმართველოს მიერ გავრცელებულ ინფორმაციასთან დაკავშირებით საქართველოსა და უკრაინის კომპეტენტურ უწყებებს შორის კომუნიკაცია გრძელდება. – განაცხადა, საქართველოში უკრაინის დროებითი რწმუნებულმა, ანდრეი კასიანოვმა.

რაც შეეხება პრემიერ-მინისტრი ირაკლი ღარიბაშვილის განცხადებას, რომ უკრაინული მხარის მიერ გავრცელებული ინფორმაცია პოლიტიკურად მოტივირებული იყო, ანდრეი კასიანოვის თქმით, უკრაინის საელჩო ქართველი მაღალჩინოსნების განცხადებებზე კომენტარს არ აკეთებს და მათი მთავარი ამოცანა საქართველოსთან პარტნიორობის განვითარებაა.

“ამ საკითხთან დაკავშირებით გრძელდება კომუნიკაცია უკრაინისა და საქართველოს კომპეტენტურ ორგანიზაციებს შორის. მე არაერთხელ ვთქვი, რომ უკრაინის საელჩო საქართველოში არ კომენტირებს უმაღლესი მაღალჩინოსნების განცხადებებს. ჩვენი მთავარი ამოცანაა, განვავითაროთ საქართველოსთან პარტნიორობა და განვამტკიცოთ სახელმწიფოთა შორის ურთიერთობები. ეს პასუხობს უკრაინელი და ქართველი ერის საჭიროებებს,” – აღნიშნა ანდრეი კასიანოვმა.

ცნობისთვის, უკრაინის თავდაცვის სამინისტროს დაზვერვის მთავარი სამმართველოს ინფორმაციით, რუსეთი სანქციების ქვეშ მოქცეული სამხედრო დანიშნულებისა და სხვა სახის პროდუქტის კონტრაბანდის არხებს ქმნის, რომელიც მათ შორის საქართველოს ტერიტორიაზე ქვეყნის ხელისუფლების თანხმობის საფუძველზე გაივლის.