“ეს სისასტიკის და არაადამიანობის გამოვლინება დატოვებულია მთელი მსოფლიოს დასანახად, უბოდიშოდ” – ჯო ბაიდენი ბუჩაზე

(ACCnews)  აშშ-ს პრეზიდენტი ჯო ბაიდენი უკრაინის ქალაქ ბუჩაში მომხდარი ტრაგედიის შესახებ მორიგ განცხადებას აკეთებს და აცხადებს, რომ “ეს არაფერია, გარდა მასშტაბური ომის დანაშაულისა.”

როგორც ბაიდენმა განცხადებაში აღნიშნა, მსოფლიო უნდა გაერთიანდეს, რათა ბუჩაში მომხდარ დანაშაულში მონაწილე ყველა პირს პასუხისმგებლობა დაეკისროს.

“დარწმუნებული ვარ, ნახეთ ფოტოები ბუჩადან და კიევის მიმდებარე ტერიტორიებიდან. ქუჩაში დატოვებული ცხედრები მას შემდეგ, რაც იქ რუსი ჯარისკაცები იყვნენ.  ზოგიერთ მათგანს ხელშეკრულს ზურგიდან ესროლეს. მოქალაქეები ცივსისხლიანად დახოცეს, ცხედრები მასობრივ საფლავებში ყრია. ეს სისასტიკის და არაადამიანობის გამოვლინება დატოვებულია მთელი მსოფლიოს დასანახად, უბოდიშოდ.

ეს არაფერია, გარდა მასშტაბური ომის დანაშაულისა. ქვეყნები უნდა გაერთიანდნენ, რათა ამაში დამნაშავეებს პასუხისმგებლობა დაეკისროთ,” – განაცხადა ჯო ბაიდენმა.

ცნობისთვის, რამდენიმე დღის წინ ქალაქი ბუჩა უკრაინულმა არმიამ რუსი დამპყრობლებისგან გაათავისუფლა. ქალაქის გათავისუფლების შემდეგ უკრაინულმა მხარემ ბუჩაში მშვიდობიანი  მოქალაქეების ცხედრები იპოვეს. საერთაშორისო მედია-სააგენტოების ფოტო-რეპორეპორტაჟებში ჩანს ქუჩებში მიმოფანტული მოკლული ადამიანები. ჟურნალისტების და უკრაინის ხელისუფლების წარმომადგენელთა ინფორმაციით კი ზოგიერთ მოკლულს ხელები შეკრული ჰქონდა.