(ACCnews) ბიძინა ივანიშვილისათვის მოსალოდნელი სანქციების დაწესების შესახებ გავრცელებულ ინფორმაციას ეხმაურება სოციალურ ქსელში ანალიტიკოსი გია ხუხაშვილი. ხუხაშვილი ამბობს, რომ საზოგადოებისთვის მსგავსი მოლოდინის შექმნა და მხარდამჭრებში ცრუ იმედების გაღვივება, ოპოზიციის მხრიდან შეცდომაა.
„ჩვენს ხელთ არსებული ინფორმაციის საფუძველზე, ივანიშვილის სანქციების ქვეშ აღმოჩენის არანაირი ობიექტური საფუძველი არ არსებობს. შესაბამისად, ოპოზიციის მხრიდან ამ მიმართულებით მხარდამჭერებში ცრუ იმედების შექმნა დიდი იმედგაცრუებით დასრულდება. ოპოზიციის ქრონიკული პრობლემაა მოკლევადიანი შედეგის მიღების მიზნით, გრძელვადიანი თვითდაზიანების მიყენება,“- წერს გია ხუხაშვილი და აღნიშნულ საკითხთან დაკავშირებით ხელისუფლების პოზიციასაც აკრიტიკებს.
„აქ საოცარი სხვა რამეა, თვითონ ხელისუფალმა რომ დაიჯერა ეს შეთქმულების თეორია და ბანალური საბანკო ტრანზაქციების ომის და მშვიდობის თემასთან დაკავშირების პარანოიდალური კამპანია წამოიწყო. მოკლედ, ერთმანეთს აგიჟებენ, გიჟდებიან და ჩვენც საგიჟეთში გვაცხოვრებენ,“- წერს გია ხუხაშვილი.
ცნობისათვის, მედიაში გავრცელებული ცნობით, ბიძინა ივანიშვილი შვეიცარიულ ბანკს მეორედ უჩივის, ამბობს რა, რომ ბანკის მიერ დაფუძნებულ Green Vals Trust-ში ოპერაციები შეფერხდა, რითაც ივანიშვილს მნიშვნელოვანი ფინანსური ზიანი მიადგა. აღნიშნულ ფაქტს ქართულ პოლიტიკური სპექტრის მხრიდან განსხვავებული შეფასებები მოჰყვა. ოპოზიციის წარმომადგენლები ივანიშვილისათვის სანქციების შესაძლო დაწესებაზე ალაპარაკდნენ. მოვლენების ამგვარ განვითარებას არც ხელისუფლების მხარდამჭერები გამორიცხავენ და ივანიშვილს უპირობო მხარდაჭერას უცხადებენ.
