(ACCnews) “აშშ-ის შეიარაღებული ძალების წარმომადგენლები უკრაინაში დასავლეთის მიერ მიწოდებული იარაღის ინსპექტირებას ახორციელებენ” – ინფორმაციას სააგენტო „ესოშიეტიდ პრესი“ პენტაგონზე დაყრდნობით ავრცელებს.
ოფიციალური პირი, რომელმაც მედიასთან ანონიმურობის დაცვით ისაუბრა, არ აკონკრეტებს სად ტარდება ინსპექტირება. თუმცა აღნიშნა, რომ აშშ-ს პერსონალს არ შეუძლია ინსპექტირების ჩატარება “ფრონტის ხაზთან ახლოს”, მაგრამ თქვა, რომ ისინი მიდიან იქ, სადაც უსაფრთხოების პირობები ამის საშუალებას იძლევა.
ოფიციალური პირის თქმით, ჯერჯერობით, უკრაინელი ოფიციალური პირები გამჭვირვალედ ეკიდებიან იარაღის განაწილებას და მხარს უჭერენ ინსპექტირებას.
პენტაგონის წარმომადგენლის თქმით, ეს ძალისხმევა არის გასულ კვირას აშშ-ის სახელმწიფო დეპარტამენტის მიერ გამოცხადებული უფრო ფართო კამპანიის ნაწილი, რომელიც მიმართულია იმისკენ, რომ უკრაინისთვის მიწოდებული იარაღი არ აღმოჩნდეს რუსეთის ძალების, მათი მარიონეტების ან სხვა ექსტრემისტული ჯგუფების ხელში.
