(ACCnews) “უბედური შემთხვევის უშუალო საფრთხე არ არსებობს, მაგრამ სიტუაცია ნებისმიერ მომენტში შეიძლება შეიცვალოს” IAEA-ს ხელმძღვანელი რაფაელ გროსი რუსეთს და უკრაინას მოუწოდებს დაუყოვნებლივ შეწყვიტონ დაბომბვა ზაპოროჟიეს ატომური ელექტროსადგურის ტერიტორიაზე. ამის შესახებ მან გაეროს უშიშროების საბჭოში ისაუბრა. ინფორმაციას BBC ავრცელებს.
„ამ რთულ, ბნელ დროს, IAEA-ს მისია უნდა შეუშვან ზაპოროჟიეში რაც შეიძლება მალე“, – თქვა მან
უკრაინა და დასავლეთის ქვეყნები ამბობენ, რომ რუსული ჯარები ატომური ელექტროსადგურის მიმდებარე ტერიტორიიდან ახორციელებენ საარტილერიო და სარაკეტო შეტევებს, თავად სადგურის შენობა კი სამხედრო ბაზად არის გადაქცეული. უკრაინის შეიარაღებული ძალები ვერ უპასუხებენ ამ თავდასხმებს სადგურის დაზიანებისა და მასზე ავარიის სერიოზული რისკის გარეშე.
საპასუხოდ, მოსკოვი ზაპოროჟიეს ატომური ელექტროსადგურის მისამართით სროლაში უკრაინის არმიას ადანაშაულებს. რუსეთის საგარეო უწყებაში მომხდარს „ბირთვული ტერორიზმი“ უწოდეს.
გაერო-ს უშიშროების საბჭოს სხდომაზე რუსეთს სამხედროების ზაპოროჟიეს სადგურიდან გაყვანისკენ მოუწოდა აშშ-ის სახელმწიფო მდივნის მოადგილე ბონი ჯენკინსმაც.
“ზაპოროჟიეს სადგურზე შექმნილი ვითარების მიზეზი საიდუმლო არ არის. ეს არის რუსეთის ფედერაციის გადაწყვეტილების ერთ-ერთი ტრაგიკული შედეგი მისი სუვერენული მეზობლის, უკრაინის ტერიტორიაზე შეჭრაზე”, – განაცხადა აშშ-ის სახელმწიფო მდივნის მოადგილემ ბონი ჯენკინსმა შეხვედრაზე.
აშშ-ის სახელმწიფო დეპარტამენტმა ხუთშაბათს გამოაცხადა, რომ მხარს უჭერს უკრაინის წინადადებას დემილიტარიზებული ზონის შექმნის შესახებ ატომურ ელექტროსადგურზე და მის გარშემო.
