(ACCnews) “უკრაინა არასოდეს ჩარეულა და არც გეგმავს საქართველოს საშინაო საქმეებში ჩარევას”, – ასე ეხმაურება უკრაინის საგარეო საქმეთა სამინისტროს ოფიციალური წარმომადგენლის, ოლეგ ნიკოლენკო სოციალურ ქსელში “ქართული ოცნების” თავმჯდომარის, ირაკლი კობახიძის განცხადებას, რომ “უკრაინის ხელისუფლება პირდაპირ იყო ჩართული სააკაშვილის საქართველოში გამოგზავნის სპეცოპერაციაში, რაც საბედნიეროდ ჩავარდა”.
ნიკოლენკოს თქმით, საქართველოს ხელისუფლება უკრაინაში ომის თემით სპეკულირებს, რათა რათა მიაღწიოს ვიწრო შიდა პოლიტიკურ მიზნებს.
“საქართველოს მმართველი პარტიის ლიდერმა განაცხადა, რომ მიხეილ სააკაშვილის მოსვლა უკრაინის სპეცოპერაცია იყო თბილისის ომში ჩართვის მიზნით.
ასეთი სახის ჭორებს ზოგიერთი ქართველი პოლიტიკოსი საქართველოში, ადამიანის უფლებების უხეშ დარღვევებზე პასუხისმგებლობისგან თავის დასაღწევად ავრცელებს.
უკრაინა არასოდეს ჩარეულა და არც გეგმავს საქართველოს საშინაო საქმეებში ჩარევას.
ღრმად იმედგაცრუებული ვართ, რომ საქართველოს ხელისუფლება სპეკულირებს უკრაინაში ომის თემაზე, რათა მიაღწიოს ვიწრო შიდა პოლიტიკურ მიზნებს.
ჩვენ განვაახლებთ ჩვენს მოწოდებას მიხეილ სააკაშვილთან წვდომის უზრუნველსაყოფად უკრაინის უმაღლესი რადას ადამიანის უფლებათა კომისართან, დმიტრო ლუბინეცთან.
ასევე მოგიწოდებთ უკრაინის მოქალაქეს გაუწიოთ სათანადო სამედიცინო დახმარება, ასევე დააკმაყოფილოთ სასჯელის გადავადების მოთხოვნა შემდგომი მკურნალობისთვის უკრაინის, დასავლეთ ევროპის ან ამერიკის ერთ-ერთ კლინიკაში გადაყვანის მიზნით,” – წერს ოლეგ ნიკოლენკო.
