(ACCnews) უკრაინა-რუსეთის ომსა და ამ ომში რუსეთის მიერ მიღებულ შედეგებს აფასებს სოციალურ ქსელში „ევროპელი დემოკრატების“ გენერალური მდივანი მამუკა გამყრელიძე. გამყრელიძე რამდენიმე კონკრეტულ ფაქტს ასახელებს, რაც რუსეთმა ომის შედეგად მიიღო.
„ჩამოვყაროთ “იტოგში” პუტინმა რა მიიღო:
1. უკრაინის “დენაციფიკაციის” ნაცვლად ერთ მუშტად შეკრული ნაცია;
2. დემილიტარიზაციის ნაცვლად კბილებამდე შეიარაღებული და ომში გამობრძმედილი ჯარი;
3. უკრაინის რუსულენოვანი მოსახლეობისგან ყვავილების ნაცვლად პანღური;
4. ნატოს აღმოსავლეთით გაფართოების შეჩერების ნაცვლად შვედეთი და ფინეთი ნატოს წევრობის პერსპექტივით;
5. დემორალიზებული ჯარი და დახოცილი გენერლები;
6. ათასობით განადგურებული სხვადასხვა სამხედრო ტექნიკა, რომლის ჩანაცვლების საშუალება არ აქვს;
7. გაშიშვლებული კორუფცია და ინტელექტუალური პრობლემები ჯარსა და დაზვერვაში;
8. პრობლემები სამხედრო ტექნოლოგიებში და მაკომპლექტებელ ნაწილებში;
9. პრობლემები ეკონომიკასა და ფინანსებში;
10. განადგურებული რეპუტაცია;
11. უბრალო ადამიანების ზიზღი და მიუღებლობა მსოფლიოს ყველა ქვეყანაში.
12. საკუთარი მესიანური იდეოლოგიის სრული კრახი, დამცირება და ისტორიაში მკვლელის სახელით შესვლა.
და ეს მაშინ, როცა ჰქონდა პატივისცემა, უზარმაზარი პოლიტიკური გავლენა, განუსაზღვრელი ფინანსური შესაძლებლობები.
აი, რათა მერე, რათა?“ – წერს მამუკა გამყრელიძე.
ცნობისათვის, უკრაინაში ფართომასშტაბიანი ომი რუსეთმა 24 თებერვალს დაიწყო. ამ დროის შემდეგ იბომბებოდა არა მხოლოდ სამხედრო ობიექტები, არამედ სამშობიაროები, საავადმყოფოები, საბავშვო ბაღები და მშვიდობიანი მოსახლეობის საცხოვრებელი სახლებიც. ქალაქ ბუჩიდან რუსული სამხედრო ძალების გასვლის შემდეგ უკრაინულმა მხარემ აღმოაჩინა 10-ობით მშვიდობიანი მოქალაქის ცხედარი. ამ ომში 190-ზე მეტი ბავშვია მოკლული.
