(ACCnews) საქართველოში გერმანიის ახალი ელჩი პიტერ ფიშერი აცხადებს, რომ რეკომენდაციების შესრულების ხარისხის შეფასება ჯერჯერობით ნაადრევია, ვინაიდან პროცესი დაწყებულია, თუმცა, არსებობს ორი მნიშვნელოვანი საკითხი, რომელიც გათვალისწინებული უნდა იყოს.
მისი თქმით, ევროკავშირის 12 რეკომენდაციის შესრულების პროცესი უნდა იყოს ინკლუზიური, დემოკრატიული და პლურალისტური.
„ორი რამ არის მნიშვნელოვანი, პირველი ის, რომ პროცესი იყოს ინკლუზიური, დემოკრატიული და პლურალისტური და მეორე ის, რომ შედეგები უნდა იყოს ევროპულ სტანდარტებთან შესაბამისობაში“, – აღნიშნა ელჩმა.
გერმანიის ელჩს შეკითხვა დაუსვეს საქართველო-რუსეთის საზღვარზე არსებულ მდგომარეობასთან დაკავშირებითაც, კერძოდ, რა უნდა მოიმოქმედოს საქართველოს მთავრობამ საზღვარზე არსებული გრძელი რიგების ფონზე.
„ეს საქართველოს მთავრობის გადასაწყვეტია, ამაზე კომენტარი ჩემი მხრიდან გასაკეთებელი არ არის“, – აღნიშნა დიპლომატმა.
