(ACCnews) აღდგომის კუნძულზე მომხდარი ხანძრის შედეგად ცნობილი ქანდაკებები დაზიანდა. ინფორმაციას BBC იუწყება.
დაზიანებული ქანდაკებების ნაწილის აღდგენა შეუძლებელია.
ჩილეს კულტურული მემკვიდრეობის სამინისტროს ინფორმაციით, წყნარ ოკეანეში მდებარე კუნძულზე მომხდარი ხანძარი 60 ჰექტარი მიწის ფართობს მოედო.
ჩილეს ხელისუფლება ეჭვობს, რომ ხანძარი ძალით გააჩინეს. ყველაზე მეტად ვულკან რანო რარაკუს გარშემო მდებარე რაიონი დაზიანდა.
აღდგომის კუნძულზე მოაის 1000-მდე, მსოფლიოში ცნობილი ქანდაკება მდებარეობს. მათ დიდი თავები აქვთ. ქანდაკებების სიმაღლე 4 მეტრს, წონა კი 20 ტონას აღწევს. პოლინეზიურმა ტომებმა ქანდაკებები ვულკანის გაქვავებული ფერფლისგან 500 წლის წინ შექმნეს. ქანდაკებები მონოლითურია, ანუ ყველა ქანდაკება ვულკანური ქვის ერთი ნატეხისგან არის დამზადებული. მოაის ქანდაკებები იუნესკოს კულტურული მემკვიდრეობის სიაშია შეტანილი.
რაც შეეხება იმას, თუ რას ნიშნავდა ეს ქანდაკებები რაპანუის ტომისთვის მრავალი საუკუნის წინ, მეცნიერებს განსხვავებული ვერსიები აქვთ. ყველაზე გავრცელებული – თითოეული კერპი განასახიერებდა ერთ-ერთი წინაპრის სულს.
მაგრამ არის ახალი ვერსია, რომლის მიხედვითაც რაპანუიმ ქანდაკებები მოათავსა კუნძულის ირგვლივ, ნიადაგის ნაყოფიერების გაზრდის იმედით.
აღდგომის კუნძული ეკუთვნის ჩილეს, თუმცა ის მდებარეობს წყნარ ოკეანეში ჩილეს სანაპიროდან 3500 კმ-ში და უახლოესი დასახლებული კუნძულიდან 2000 კმ-ში. ევროპელები ამ კუნძულს მხოლოდ მე-18 საუკუნის დასაწყისში წააწყდნენ. კუნძულის ფართობი 164 კვ.კმ-ია, ახლა მასზე რვა ათასზე ცოტა ნაკლები ადამიანი ცხოვრობს.
