(ACCnews) ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში ჯოზეფ ბორელი საქართველოსთვის ევროპული პერსპექტივის მინიჭებას ეხმიანება ეხმიანება და აცხადებს, რომ ქვეყნისთვის ევროპული გზა სრულყოფილად არის განსაზღვრული.
როგორც ბორელი „ტვიტერზე“ წერს, ევროკავშირი მზად არის საქართველოსთან ერთად მუშაობისთვის, იმისთვის, რომ ქვეყანამ მნიშვნელოვანი შესაძლებლობა გამოიყენოს.
„საქართველო ახლა ნამდვილად ადგას ევროპულ გზას. დიახ, არსებობს პირობები. ეს არის დიდი წინგადადგმული ნაბიჯი და ჩვენ არ უნდა დავაკნინოთ ეს. პირიქით, ეს ასევე არის აღიარების ნიშანი და მკაფიო მხარდაჭერა. ახლა, ევროპული გზა საქართველოსთვის სრულყოფილად არის განსაზღვრული. იცით რა, როგორ და როდის. მზად ვართ ერთად მუშაობისთვის, საქართველოს საზოგადოების მხარდაჭერისთვის, ამ მნიშვნელოვანი შესაძლებლობის გამოყენებისთვის მისი ევროპული მომავლის ასაშენებლად,“ – აცხადებს ბორელი.
ცნობისათვის, ევროპულ საბჭოში ევროკავშირის წევრი სახელმწიფოების ლიდერების სამიტის გადაწყვეტილებით, ასოცირების ტრიოს ქვეყნებიდან ორს – უკრაინსა და მოლდოვას კანდიდატი ქვეყნის სტატუსი, საქართველოს კი – ევროპული პერსპექტივა მიენიჭა.
