(ACCnews) “ხუთი წლის განმავლობაში აშშ-ის საელჩოს ანტინარკოტიკულ და სამართალდამცავ ორგანოებთან თანამშრომლობის ოფისი აჭარაში მხარს უჭერდა სათემო პოლიციის პროგრამებს, რომლის ფარგლებშიც მუნიციპალიტეტის თანამშრომლები, მასწავლებლები, მშობლები და პოლიციის ოფიცრები ერთად მუშაობენ, რათა საკუთარი საზოგადოება უფრო უსაფრთხო გახადონ”, – აღნიშნულ ინფორმაციას აშშ-ის საელჩო საკუთარ გვერდზე ავრცელებს.
ინფორმაციის თანახმად, მუხაესტატეში გამოიკვეთა უსაფრთხო შეხვედრების სივრცის ნაკლებობა მოსწავლეებისა და საზოგადოების სხვა წევრებისთვის და ამ სივრცის შექმნა ერთობლივი მუშაობით მოხერხდა.
აშშ-ის მთავრობის მიერ დაფინანსებულმა პროექტმა ხელი შეუწყო მოსწავლეებს, პოლიციის ოფიცრებსა და მასწავლებლებს შორის სხვადასხვა თემაზე საუბრებს, მათ შორის ოჯახურ ძალადობაზე, ბავშვთა წინააღმდეგ ჩადენილ დანაშაულებზე, კიბერდანაშაულზე, ადამიანებით ვაჭრობასა და ჩაგვრაზე.
შეერთებული შტატების ელჩი საქართველოში კელი დეგნანი მუხაესტატეს საზოგადოებრივ ცენტრს ესტუმრა და განსაკუთრებით აღნიშნა თანამშრომლებისა და მოხალისეების მიერ გაწეული შესანიშნავი საქმიანობა ბავშვების უსაფრთხოებისა და კეთილდღეობისთვის.
