(ACCnews) CNN-ი ორ ამერიკელ მაღალჩინოსანზე დაყრდნობით იტყობინება, რომ მას შემდეგ, რაც რუსეთის თავდაცვის სამინისტროში განაცხადეს, რომ რუსეთი კიევთან და ჩერნიგოვთან სამხედრო აქტივობას შეამცირებდა, ამერიკის შეერთებულმა შტატებმა დააფიქსირა, რომ რუსეთი კიევის შემოგარენიდან გარკვეული ძალების გაყვანას იწყებს.
ამავე მედია საშუალების ცნობით, რუსეთი კიევის შემოგარენიდან ძალების ნაწილის, მათ შორის, რუსული ბატალიონის ტაქტიკური ჯგუფების გაყვანას იწყებს. ამასთან, CNN-ი წყაროზე დაყრდნობით იუწყება, რომ რუსეთის ძალები უკან იხევენ ჩრდილოეთის ზოგიერთი რაიონიდან რათა ფოკუსირება მოახდინოს სამხრეთით და აღმოსავლეთით.
როგორც CNN-ი იტყობინება, აშშ-ში ვარაუდობენ, რომ ეს არ არის გადაჯგუფების მოკლევადიანი გეგმა და უფრო მეტად გრძელვადიანი ნაბიჯია, რადგან რუსეთი ხვდება, რომ უკრაინის ჩრდილოეთით წინსვლა წარუმატებელი აღმოჩნდა.
შეგახსენებთ, რომ რამდენიმე საათის წინ სტამბოლში რუსეთისა და უკრაინის დელეგაციებს შორის მოლაპარაკებები დასრულდა. აღნიშნულ შეხვედრაზე გამართული მოლაპარაკებებისას უკრაინამ დაასახელა უსაფრთხოების გარანტიები და ის ქვეყნებიც, რომლებიც გარანტორად უნდა იქცნენ. ამასთან, მხარეებს შორის გამართული მოლაპარაკებებისას ოფიციალურმა კიევმა ყირიმთან და დონბასთან დაკავშირებითაც საკუთარი პოზიციები წარადგინა.
რაც შეეხება თურქეთის საგარეო საქმეთა მინისტრის განცხადებას, როგორც მევლუთ ჩავუშოღლუ განაცხადა “დღეს ყველაზე მნიშვნელოვანი პროგრესია” მიღწეული.
ამასთან, აღსანიშნავია ისიც, რომ რუსეთ-უკრაინის დელეგაციებს შორის გამართული მოლაპარაკებების დასრულების შემდეგ აქტიურად დაიწყო საუბარი ვოლოდიმირ ზელენსკისა და ვლადიმირ პუტინის შეხვედრის შესაძლებლობაზე.
