“ცეცხლის შეწყვეტა რუსეთისთვის სანქციების მოსახსნელად საკმარისი არ იქნება” – ბორის ჯონსონი

(ACCnews) “რუსეთსა და უკრაინას შორის ცეცხლის შეწყვეტის შეთანხმების მიღწევა საკმარისი არ იქნება დიდი ბრიტანეთის მიერ რუსეთისთვის დაწესებული სანქციების მოსახსნელად,” – ამის შესახებ დიდი ბრიტანეთის პრემიერ-მინისტრმა, ბორის ჯონსონმა განაცხადა.

როგორც გამოცემა Reuters-ი წერს, დიდი ბრიტანეთის პრემიერმა აღნიშნა, რომ რუსეთის პრეზიდენტ ვლადიმირ პუტინზე ზეწოლა უნდა გაიზარდოს ეკონომიკური ზომებისა და უკრაინისთვის სამხედრო დახმარების გაწევის გზით, რათა რუსეთის მოქმედებების კურსი სრულად შეიცვალოს.

“პრემიერმინისტრმა თქვა, რომ მხოლოდ ცეცხლის შეწყვეტის შეთანხმება არ იქნება რუსეთის წინააღმდეგ გაერთიანებული სამეფოს მიერ დაწესებული სანქციების მოხსნის მიზეზი,” – თქვა ბორის ჯონსონის სპიკერმა ჟურნალისტებს კაბინეტის სხდომის შესახებ საუბრისას.

შეგახსენებთ, რომ რამდენიმე საათის წინ სტამბოლში რუსეთისა და უკრაინის დელეგაციებს შორის მოლაპარაკებები დასრულდა. აღნიშნულ შეხვედრაზე გამართული მოლაპარაკებებისას უკრაინამ დაასახელა უსაფრთხოების გარანტიები და ის ქვეყნებიც, რომლებიც გარანტორად უნდა იქცნენ. ამასთან, მხარეებს შორის გამართული მოლაპარაკებებისას ოფიციალურმა კიევმა ყირიმთან და დონბასთან დაკავშირებითაც საკუთარი პოზიციები წარადგინა.

რაც შეეხება თურქეთის საგარეო საქმეთა მინისტრის განცხადებას, როგორც მევლუთ ჩავუშოღლუ განაცხადა “დღეს ყველაზე მნიშვნელოვანი პროგრესია” მიღწეული.

ამასთან, აღსანიშნავია ისიც, რომ რუსეთ-უკრაინის დელეგაციებს შორის გამართული მოლაპარაკებების  დასრულების შემდეგ აქტიურად დაიწყო საუბარი ვოლოდიმირ ზელენსკისა და ვლადიმირ პუტინის შეხვედრის შესაძლებლობაზე.