(ACCnews) დიდი ბრიტანეთი შეშფოთებულია, რომ ამერიკის შეერთებულმა შტატებმა, საფრანგეთმა და გერმანიამ უკრაინას რუსეთთან სამშვიდობო მოლაპარაკებებში მნიშვნელოვანი დათმობებისკენ უბიძგეს. ამის შესახებ ბრიტანული გამოცემა The Times-ი წერს.
გამოცემა წყაროზე დაყრდნობით წერს, ბრიტანეთში შეშფოთებას იწვევს ის საკითხი, რომ მოკავშირეები „ზედმეტად სწრაფად“ ცდილობენ სამშვიდობო შეთანხმების მიღწევას. გაერთიანებულ სამეფოში მიიჩნევენ, რომ საკითხის დარეგულირება მაშინ უნდა მოხდეს, როდესაც უკრაინას ყველაზე ძლიერი პოზიციები ექნება.
როგორც The Times-ი წერს, სატელეფონო საუბარში ბორის ჯონსონმა პრეზიდენტი ზელენსკი გააფრთხილა, რომ ვლადიმერ პუტინი „მატყუარა და ხულიგანია“, რომელიც საუბრის პროცესს უკრაინის გამოსაფიტად და მისი მხრიდან დათმობების მისაღებად გამოიყენებს.
ცნობისთვის, უკრაინაში ომის დაწყების დღიდან, უკრაინა–რუსეთის მოლაპარაკებების რამდენიმე რაუნდი გაიმართა. ბოლო მოლაპარაკებების შემდეგ, რომელიც სტამბოლში შედგა, მხარეებმა განაცხადეს, რომ პოზიციები მეტნაკლებად დაახლოვდა.
