(ACCnews) “პუტინმა „თავისი რისხვა და თავისი ცეცხლი“ მიმართა უკრაინის სამოქალაქო მოსახლეობის წინააღმდეგ, დარტყმები მიაყენა ინფრასტრუქტურას, რომელიც უკრაინელებს გათბობით, წყლითა და ელექტროენერგიით უზრუნველყოფს,” – ეს განცხადება აშშ-ის სახელმწიფო მდივანმა ენტონი ბლინკენმა ბუქარესტში ნატოს ორდღიანი სამიტის დასრულების შემდეგ გააკეთა.
მისი თქმით, რუსეთის უკანასკნელი პერიოდის სტრატეგია, რომელიც უკრაინის ენერგეტიკულ ინფრასტრუქტურაზე თავდასხმას ითვალისწინებს, ვერ გახლეჩს უკრაინის მხარდამჭერებს.
„ჩვენ ვიცნობთ პუტინის სცენარს: გაყინოს და დაამშიოს უკრაინელები, გამოყაროს ისინი სახლებიდან, გაზარდოს ენერგიის, სურსათისა და სხვა საყოფაცხოვრებო ხარჯები არა მხოლოდ ევროპაში, არამედ მთელ მსოფლიოში და შემდეგ შეეცადოს გახლიჩოს ჩვენი კოალიცია“, – თქვა ბლინკენმა.
შეგახსენებთ, რუსეთის მიერ ენერგოსისტემაზე სარაკეტო იერიშების შედეგად, ყინვის პირობებში მილიონობით ადამიანი დარჩა უშუქოდ და გათბობის გარეშე.
