(ACCnews) უკრაინის გაზის სატრანსპორტო სისტემის ოპერატორის განცხადების თანახმად, რუსი ოკუპანტების ქმედებების გამო, უკრაინა რუსეთიდან ევროპაში გაზის მესამედის ტრანზიტს აჩერებს.
როგორც მათ მიერ გავრცელებულ განცხადებაშია ნათქვამი, გაზის გამანაწილებელი სადგური “სოხრანივკას” და “ნოვოპსკოვი” მუშაობას 11 მაისს შეაჩერებენ. ამასთან, უკრაინის გაზის სატრანსპორტო კომპანიაში აცხადებენ, რომ ბუნებრივი აირის მიწოდების შეზღუდვა იმიტომ უწევთ, რომ აღნიშნული სადგურები ამჟამად რუსეთის მიერ კონტროლირებად ტერიტორიაზე მდებარეობს.
აღსანიშნავია, რომ უკრაინა ევროპას სთავაზობს, რომ “სოხრანივკას” ნაცვლად დაკლებული ბუნებრივი აირის რაოდენობა სუდჟას სადგურიდან მიაწოდოს, რათა საკუთარი სატრანზიტო ვალდებულებები შეასრულოს.
“უკრაინის გაზის სატრანზიტო სისტემის ოპერატორი იტყობინება ფორსმაჟორული სიტუაციის შესახებ, რომლის გამოც გაზის გამანაწილებელი სადგური სოხრანივკიდან და საკომპრესო სადგური ნოვოფსკოვიდან, რომლებიც ოკუპირებულ ტერიტორიებზე მდებარეობენ, ბუნებრივი აირის ტრანსპორტირების გაგრძელებას შეუძლებელს ხიდს. საკომპრესო სადგური ნოვოფსკოვი არის ლუგანსკში უკრაინის გაზის ტრანზიტის სისტემის პირველი საკომპრესო სადგური, რომლიდანაც ევროპაში რუსული გაზის თითქმის 1/3 (დღეში 32.6 კუბურ მეტრამდე) გადის. უკრაინის წინააღმდეგ რუსეთის ფედერაციის სამხედრო აგრესიის შედეგად, რამდენიმე გაზის გამანაწილებელი სადგურის ობიექტი მდებარეობს ტერიტორიაზე, რომელსაც რუსი სამხედროები და საოკუპაციო ადმინისტრაცია დროებით აკონტროლებენ.
ამჟამად, უკრაინის გაზის სატრანზიტო სისტემის ოპერატორს არ შეუძლია ოპერაციული და ტექნიკური კონტროლი ჰქონდეს საკომპრესო სადგურ ნოვოფსკოვსა და ამ ტერიტორიებზე მყოფ სხვა საკუთრებებზე. ამას გარდა, საოკუპაციო ძალების ტექნიკურ პროცესში ჩარევისა და გაზის განაწილების სისტემის ობიექტების მუშაობის სისტემის ცვლილების, მათ შორის ნებართვის გარეშე გაზის მიწოდების ნაკადებიდან ბუნებრივი აირის გაშვების შედეგად, მთელი უკრაინის გაზის სატრანზიტო სისტემის სტაბილურობასა და უსაფრთხოებას საფრთხე ემუქრება”. – ნათქვამია განცხადებაში.
