საფრანგეთის პრეზიდენტს, ემანუელ მაკრონსა და ვლადიმერ პუტინს შორის უკრაინის საკითხზე სატელეფონო საუბარი შედგა.
როგორც საფრანგეთის პრეზიდენტის ადმინისტრაციის მიერ გავრცელებულ განცხადებაშია ნათქვამი, ორი ქვეყნის პრეზიდენტებს შორის სატელეფონო საუბარი 1 საათი 45 წუთი გაგრძელდა.
მათივე განცხადების თანახმად, ემანუელ მაკრონი რუსეთის პრეზიდენტთან სატელეფონო საუბრის შემდეგ უკრაინის პრეზიდენტს, ვოლოდიმერ ზელენსკის 30 წუთი ესაუბრა.
რაც შეეხება კრემლის მიერ გავრცელებულ ინფორმაციას, როგორც განცხადებაშია აღნიშნული რუსეთისა და საფრანგეთის პრეზიდენტებს შორის “გაიმართა აზრთა საფუძვლიანი გაცვლა უკრაინის გარშემო არსებულ ვითარებაზე, ასევე რუსეთის ფედერაციის უსაფრთხოების გრძელვადიანი სამართლებრივი გარანტიების შემუშავებაზე.
ასევე, კრემლის ინფორმაციით, მაკრონმა და პუტინმა საუბრისას შეშფოთება გამოთქვეს დონბასში სიტუაციის მკვეთრი გაუარესების გამო.
ამავე განცხადების თანახმად, ვლადიმერ პუტინმა საუბრისას ხაზგასმით აღნიშნა, რომ გამწვავების მიზეზი უკრაინის ძალების პროვოკაცია იყო და ყურადღება გაამახვილა “ნატოს ქვეყნებზე, რომლებიც უკრაინას თანამედროვე იარაღითა და საბრძოლო მასალით ეხმარებიან.”
ამასთან, რუსეთის პრეზიდენტმა მაკრონთან საუბრისას აღნიშნა, რომ კიევის ხელისუფლება მხოლოდ მოლაპარაკების პროცესის იმიტაციას ახდენს და მინსკის შეთანხმებების შესრულებაზე ჯიუტად უარს ამბობს.
“მდგომარეობის ამჟამინდელი სიმძიმის გათვალისწინებით, პრეზიდენტებმა მიზანშეწონილად მიიჩნიეს დიპლომატიური გზებით გადაწყვეტილებების ძიება საგარეო საქმეთა სამინისტროებისა და ნორმანდიულ ფორმატში მონაწილე ქვეყნების ლიდერების პოლიტიკური მრჩევლების მეშვეობით“, – ნათქვამია კრემლის მიერ გავრცელებულ ინფორმაციაში.
