(ACCnews) უკრაინის პრეზიდენტმა, ვოლოდიმირ ზელენსკიმ ამერიკელი სენატორების დელეგაციასთან საუბრისას, აშშ-ს უკრაინის მხარდაჭერაში ლიდერული პოზიციის დაკავებისთვის მადლობა გადაუხადა.
ამასთან, უკრაინის ლიდერმა სენატორებთან საუბრისას, შეერთებული შტატების განსაკუთრებული როლზე ისაუბრა. ზელენსკიმ იმედი გამოთქვა, რომ აშშ-ს სენატი ოპერატიულად დაამტკიცებს უკრაინელი ხალხის მხარდასაჭერად დამატებითი დაფინანსების პაკეტს, რომელიც უკვე განიხილება წარმომადგენელთა პალატაში და გაიზარდა 33 მილიარდი დოლარიდან 39,6 მილიარდ დოლარამდე.
ასევე, უკრაინის პირველი პირი მიიჩნევს, რომ განსაკუთრებით მნიშვნელოვანია სასანქციო წნეხის გაზრდა აგრესორი ქვეყნის საბანკო სექტორზე. მისივე თქმით, რუსეთი უკრაინელი ხალხის წინააღმდეგ გენოციდს ახორციელებს.
“იმედს ვამყარებ ამერიკის შეერთებული შტატების თანადგომაზე სანქციების შემდგომი გამკაცრების კუთხით. ამის გარდა, მივიჩნევ, რომ რუსეთი ოფიციალურად უნდა იქნას ცნობილი ტერორიზმის დამფინანსებელ სახელმწიფოდ. რუსეთი სჩადის სამხედრო დანაშაულებს, რომლითაც შეშფოთებულია მთელი მსოფლიო – წამება, მასობრივი დაცხრილვა, გაუპატიურება. ასეთი დანაშაული ევროპას აღარ უნახავს მეორე მსოფლიო ომის შემდეგ,” – განაცხადა უკრაინის პრეზიდენტმა.
