“თურქეთი ყოველთვის უჭერდა მხარს საქართველოს ნატოში გაწევრიანებას და დღესაც იგივე პოზიცია გვაქვს” – ფატმა ჯერენ იაზგანი

(ACCnews) “თურქეთი ყოველთვის უჭერდა მხარს საქართველოს ნატოში გაწევრიანებას და დღესაც იგივე პოზიცია გვაქვს, თურქეთი იქნება ნატოსკენ მიმავალ გზაზე საქართველოს მტკიცე მხარდამჭერი,” – ამის შესახებ საქართველოში თურქეთის ელჩმა, ფატმა ჯერენ იაზგანმა განაცხადა.

ამასთან, როგორც ფატმა ჯერენ იაზგანმა განაცხადა, თურქეთი ყოველთვის აფიქსირებს თავის მხარდაჭერას საქართველოს ტერიტორიული მთლიანობისა და სუვერენიტეტისადმი.

“თურქეთის მთავრობა ყოველთვის ადასტურებს, რომ თუ საქართველოს ნატოში ინტეგრაციისთვის დასჭირდება თავდაცვისუნარიანობის განმტკიცების მიზნით ტრენინგები ან სხვადასხვა სახის ღონისძიებები, თურქეთი ყოველთვის მზადაა, მხარი დაუჭიროს მას. თურქეთი ყოველთვის უჭერდა მხარს საქართველოს ნატოში გაწევრიანებას და დღესაც იგივე პოზიცია გვაქვს.

ჩვენ დღესვე გაგვიხარდება საქართველოს ნატოში ხილვა. ჩვენი პოზიცია არათუ არ შეიცვალა, არამედ უფრო გაძლიერდა, რაც განაპირობა რეგიონში განვითარებულმა მოვლენებმა. ჩვენ ვაფიქსირებთ მხარდაჭერას საქართველოს ტერიტორიული მთლიანობისა და სუვერენიტეტისადმი.

ვინაიდან ქართველი ხალხი და საქართველოს მთავრობა აგრძელებს ნატოში გაწევრიანების გზაზე სვლას, თურქეთი იქნება ნატოსკენ მიმავალ გზაზე საქართველოს მტკიცე მხარდამჭერი“, – განაცხადა საქართველოში თურქეთის ელჩმა.