(ACCnews) ევროკომისიის ვიცე-პრეზიდენტი, ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში ჯოზეფ ბორელი უკრაინაში ვიზიტის შემდეგ უკრაინის მხარდასაჭერად ახალ ნაბიჯებს აანონსებს.
კერძოდ, ჟოზეფ ბორელი “ტვიტერის” საკუთარ გვერდზე უკრაინის მხარდასაჭერად 4 პუნქტიანი სიას აქვეყნებს.
გარდა ამისა, ბორელმა “ტვიტერში” ისიც აღნიშნა, რომ უკრაინა გაიმარჯვებს და კიდევ უფრო ძლიერი გახდება.
“- ეს ომი ბრძოლის ველზე იქნება მოგებული. დამატებითი 500 მილიონი ევრო ევროპის სამშვიდობო ფონდიდან (EPF) გზაშია. იარაღის მიწოდება უკრაინის საჭიროებებზე იქნება მორგებული.
– ომის დანაშაულები: კრამატორსკში რუსეთის სასტიკი თავდასხმა დაუცველ მშვიდობიანი მოსახლეობის წინააღმდეგ კვლავ აჩვენებს კრემლის სრულ უპატივცემულობას ადამიანის სიცოცხლის მიმართ. ეს მხოლოდ გაზრდის ჩვენს მხარდაჭერას უკრაინის მიმართ. ხვალ შევხვდები სისხლის სამართლის საერთაშორისო სასამართლოს პროკურორს და განვიხილავ მორგებულ მხარდაჭერას, მათ შორის ევროკავშირის საკონსულტაციო მისიას (EUAM) უკრაინაში.
– ჩვენ უნდა გავაგრძელოთ ზეწოლა რუსეთზე. ჩვენ უკვე დავუწესეთ მძიმე სანქციები, მაგრამ მეტი უნდა გაკეთდეს ენერგეტიკის სექტორში, ნავთობის ჩათვლით.
– ორშაბათს, ვიწვევ ევროკავშირის საგარეო საქმეთა საბჭოს (FAC), რათა განვიხილო შემდეგი ნაბიჯები.
ევროკავშირი გააგრძელებს თქვენს გვერდში დგომას ყოველ ნაბიჯზე. Слава Україні!“- წერს ჟოზეფ ბორელი.
